Ո՞վ է Ստամբուլահայ կանանց դեմ հարձակման մեջ կասկածվող հայը. նոր մանրամասներ

Ստամբուլահայ տարեց կանանց դեմ հարձակման մեջ մեղադրանքով ձերբակալված Մուրադ Նազարյանի մասին նրան ճանաչողները միաբերան պնդում են, թե հնարավոր չէ, որ նա այդպիսի քայլեր արած լինի։ Մուրադ Նազարյանի անձի մասին մանրամասներ իմանալու համար Hürriyet-ի թղթակից Սեյիթ Էրչիչեքմիշն այցելել է այն թաղամասը որտեղ ապրել է Մուրադը եւ զրուցել նրան ճանաչողների հետ։

Ստամբուլահայ Մուրադ Նազարյանը երկար տարիներ ապրել է Քումքափըում (Գումգափու)։ Աշխատել է փոքրիկ խանութներում կամ տաղավարներում՝ ստանալով օրական 25 լիրա  (6000 դրամ) աշխատավարձ։  Թաղամասում, որտեղ ապրել է նա, մի խանութպան նշել է, որ շատ է զարմացել, երբ հեռուստացույցով տեսել է, որ նրան ոստիկանություն են տանում։

Քումքափը թաղամասում նրա բոլոր ընկերները Մուրադին համարում են անաղմուկ, հանգիստ եւ ոչ մեկին վնաս չտվող մեկը։ Թաղամասում նույնիսկ նրան «դժբախտ Մուրադ» էին կոչում։

Թաղամասի գործարարներից Յ.Ք.-ն նշել է, որ Մուրադ Ն.-ն մոտ 6 ամիս իր տանը վարձով է ապրել՝ շեշտելով. «Ոչ ոքի հետ երբեք չէր վիճի։ Հանդարտ ու հանգիստ մարդ էր։ Ինքը չէր կարող նման բան անել։ Ես շատ զարմացած եմ»։

Թաղամասի խանութպաններից Ի.-ն պատմել է, որ Մուրադը կարճ ժամանակով իր մոտ աշխատել է, սակայն ինքը եւս շատ էր զարմացել, երբ նման բան էր իմացել հեռուստատեսությամբ։

Թաղամասի վարսավիրներից Ջ. Ա.-ն նշել է, որ Մուրադին մոտիկից է ճանաչել։ «Նա իմ մոտ էր միշտ սափրվում։ Գումարը տալիս էր, բայց հասկանում էինք, որ հազիվ էր հասցնում։ Այնուհետ իմացանք, որ նրան նման բանի մեջ են մեղադրում։ Հավատացեք, նա նման բան անող չէր։ Կարծես թե հոգեկան խնդիրներ ուներ, ասում են, թե մեկ-մեկ ինքն իր հետ խոսում էր»,-ասում էր վարսավիրը։

Ձերբակալվելուց հետո դատարան տեղափոխված Մուրադ Ն.-ն հայտարարել էր, թե չի հավատում, որ ինքը մեղավոր է սպանության համար։ Մուրադը նշել է, որ ինքը հայ է, որ իր ռումինացի կինն իրեն լքել էր, սակայն ոչ մի կերպ չի հիշել, որ ինքն է սպանել ստամբուլահայ Մարիցա Քյուչուքին։

«Ես բան չեմ հիշում։ Եթե հիշեմ, կասեմ։ Սպանված Մարիցա Քյուչուքին էլ չեմ ճանաչում։ Նրա տուն էլ չեմ գնացել, ավելի ճիշտ՝ չեմ հիշում, թե գնացել ե՞մ, թե՞ չեմ գնացել։ Եթե ինչ որ բան արած լինեմ, կարող է դեղ ընդունած ժամանակ կամ հոգեկան խնդիրների ազդեցության տակ եղած լինի։ Նախկինում թմրանյութ օգտագործել եմ։ Ոստիկանությունում ինձ ցույց տվեցին տեսախցիկների ֆիքսած մի մարդու՝ պնդելով, որ դա ես եմ։ Սակայն ես վստահ չեմ, որ այդ տեսագրությունների մեջ ես եմ։ Ես չեմ հավատում, որ մեղավոր եմ, չեմ ընդունում իմ դեմ ուղղված մեղքը»,-ասել է Մուրադ Նազարյանը։

http://news.am/arm/news/143630.html