Ստամբուլում շարունակում են խոսել հայ կանանց վրա հարձակում գործած անձի ձերբակալության մասին

Ստամբուլի հայաշատ Սամաթյա թաղամասում հայ կանանց վրա հարձակումների մեղադրանքով հայազգի Մուրաթ Նազարյանի ձերբակալությունը գոհացրել է Ստամբուլի Ֆաթիհ շրջանի քաղաքապետ Մուստաֆա Դեմիրին: Ինչպես հաղորդում է «Արմենպրես»-ը, քաղաքապետը այս մասին նշել է թուրքական Hurriyet Daily News պարբերականի հետ զրույցում: «Նախքան հանցագործի ձերբակալությունը, կային սադրիչ և խտրականությամբ հարուստ սցենարներ: Սակայն չպետք է մոռացվի այն մարդկանց պատմությունը, ովքեր 550 տարի Սամաթյայում ապրել են միասին: Կարևոր չէ` նրանք թուրքեր են, հայեր, թե մահմեդականներ. փաստն այն է, որ այստեղ գործվել է հանցագործություն»,- ասել է Ֆաթիհի քաղաքապետը: Նա հերթական անգամ առաջ է քաշել այն միտքը, որ հաշվի առնելով հարձակման ենթարկվածների մեծ տարիքը` ենթադրվում է, որ նրանք թիրախ են դարձել իրենց խոցելիության, այլ ոչ թե ազգային պատկանելության համար: «Որպես Ֆաթիհ շրջանի քաղաքապետ` ես նախ և առաջ ուրախ եմ կասկածյալի ձերբակալության համար: Ես նաև կցանկանայի շնորհակալություն հայտնել Սամաթյայի Սուրբ Գևորգ եկեղեցու ղեկավարությանը` իրենց ցուցաբերած հանգիստ վերաբերմունքի համար», – ասել է Դեմիրը:

Այդուհանդերձ, Ստամբուլի հայկական համայնքի ներկայացուցիչները որոշակի վերապահումով են վերաբերվում ձերբակալված անձի` որպես իրական հանցագործ լինելու փաստին: Հարձակման զոհ դարձած Թուրհանդա Աշըքի հարսը` Արև Ջեբեջին, նշել է, որ ինքը որոշակի երկմտանք ունի Մուրաթ Նազարյանի առնչությամբ: «Նրանք ասում են, որ եղել է գողության փորձ, սակայն նա այնպիսի զարդեղեն էր գողացել, որը մեծ նյութական արժեք չունի: Հաղորդվում է նաև, որ Նազարյանն ապրում է Սամաթյայում և օգնություն է ստանում եկեղեցուց, սակայն եկեղեցու գրանցումներում նման տեղեկատվությունը բացակայում է»,- ասում է նա:

Ստամբուլի Սամաթյա թաղամասում առաջին հարձակումը 87-ամյա հայուհի Թուրհանդա Աշըքի վրա տեղի է ունեցել անցյալ դեկտեմբերի սկզբին: Հանցագործը դաժանորեն ծեծել է նրան, ինչի հետեւանքով կինը կորցրել է ձախ աչքը: Երկրորդ հարձակումը կատարվել է դեկտեմբերի 28-ին, որի ժամանակ հանցագործը սպանել է 84-ամյա Մարիցա Քյուչյուքին եւ վրան դանակով խաչ նկարել: Հաջորդ հարձակումները տեղի են ունեցել հունվարի 6-ին, 22-ին եւ փետրվարի սկզբին: Այդ հարձակումների ժամանակ հանցագործը ծեծել է տարեց կանանց, ինչի հետեւանքով նրանցից մեկը` 83-ամյա Սուլթան Այքարը, կորցրել է մի աչքը, իսկ մյուսի աչքը վիրահատել են:

Ստամբուլի ոստիկանությունը մարտի 4-ին ձերբակալել է Մուրաթ Նազարյանին, ով, ըստ թուրքական ոստիկանության, տարեց հայ կանանց վրա հարձակումներ էր գործել «կողոպուտի» նպատակով: Ստամբուլի ոստիկանության հայտարարության մեջ նշված է, որ Ֆաթիհ թաղամասում ձերբակալված 40-ամյա կասկածյալը նախկինում դատապարտված է եղել նման հանցագործություններ կատարելու համար:

Ավելի վաղ թուրքական ԶԼՄ-ները հայտնել էին, որ հանցագործը տարեց կանանց թալանելու փորձ չի արել: Բազմաթիվ լրատվամիջոցներ եւ հասարակական գործիչներ կարծիք էին հայտնել, որ հանցագործությունները կատարվել են էթնիկ հողի վրա` Հայոց ցեղասպանության 100-ամյա տարելիցին ընդառաջ թուրքական կողմի` հայերին վախեցնելու գործողությունների շրջանակում:

http://armenpress.am/arm/news/710641/stambulum-sharunakum-en-khosel-hay-kananc-vra-hardzakum.html