Ապրիլի 24-ին Ստամբուլում հայերն ու թուրքերը դուրս կգան Թաքսիմի հրապարակ

Ապրիլի 24-ին Ստամբուլի Թաքսիմ հրապարակում միջոցառում տեղի կունենա` նվիրված Հայոց ցեղասպանության զոհերի հիշատակին: Այս մասին NEWS.am-ի թղթակցի հետ զրույցում հայտարարել է Ստամբուլում լույս տեսնող «Ակօս» թերթի գլխավոր խմբագիր Ռոբեր Քոփթաշը: Նրա խոսքով` արդեն ավանդական դարձած միջոցառումը կազմակերպվում է քաղաքի հայերի եւ թուրքերի համատեղ ջանքերով:

Հիշեցնենք, որ նախորդ տարի միջոցառմանը մասնակցել էին Հրանտ Դինքի այրի Ռաքել Դինքը, խորհրդարանում քրդական Խաղաղություն եւ ժողովրդավարություն խմբակցության պատգամավորներ Սըրրը Սուրեյա Օնդերը, Սեբահաթ Թունջելը, լրագրող Օրալ Չալըշլարը, Ուֆուք Ուրասը, պրոֆեսոր Բասքըն Օրանը, բանակում ապրիլի 24-ին սպանված հայ զինվոր Սեւակ Շահին Բալաքչըի ընտանիքի անդամները եւ այլք:

Առաջին անգամ, 1915 թվականի զոհերի հիշատակին նվիրված միջոցառմանը կոչով հանդես են եկել հայ համայնքի ներկայացուցիչները, որպես խորհրդանիշ ընտրելով նուռը, որը բաց արյունոտ վերքի խորհրդանիշ է: Կտրված նռան վրա գրված է եղել. «Ժամանակի չի բուժում որոշ վերքեր. 1915 թ., ապրիլի 24»:

http://news.am/arm/news/143321.html