Նոր մանրամասներ` Ստամբուլում հայ կանանց վրա հարձակվողի մասին

Ստամբուլի ոստիկանությունը ձերբակալել է Մուրաթ Ն.-ին, ով կասկածվում է անցյալ դեկտեմբերից մինչեւ 2013 թ. փետրվարի կեսերը Ստամբուլի Սամաթյա թաղամասում 5 տարեց հայ կանանց վրա հարձակումներ գործելու մեջ, նշել, որ «կասկածյալը ազգությամբ հայ է» եւ հայտնել նրա ազգանունը` Նազարյան:

Ինչպես հաղորդում է «Արմենպրես»–ը, թուրքական «Հուրիեթ» թերթն այդ առնչությամբ գրում է, որ հյուրանոցի տնօրենը, որտեղ բնակվում էր կասկածյալը, պատմել է, որ Մուրաթին ձերբակալել են, երբ նա վերադարձել է հերթական նամազից: «Մոտ մեկ ամիս առաջ գիշերվա կեսին Մուրադը, ցրտից սրթսրթալով, եկավ ինձ մոտ: Նա փող չուներ: Ես նրան սենյակ տվեցի եւ առաջարկեցի աշխատել թեյարանում: Օրական նրան 20 լիրա էի վճարում: Անցյալ շաբաթ օրը ոստիկանները եկան: Ռոբոտի լուսանկարը տեսնելու ժամանակ նմանեցրի Մուրադին: Ասացի, որ նամազի է գնացել, շուտով կգա: Վերադառնալուն պես ոստիկանները ձերբակալեցին նրան: Ոստիկանների մոտ նրան հարցրեցի. «Տղա’ս, դու՞ ես սպանել»:  Ասաց. «Չեմ հիշում»«, -պատմել է հյուրանոցի տերը:

Հյուրանոցի մի այլ բնակիչ, որը չի ցանկացել հայտնել անունը, նշելով, որ Մուրադին վաղուց է ճանաչում, թերթի թղթակցին ասել է. «Նա նման չէ այդպիսի հանցագործություն կատարողի: Նա ոչ ոք չունի: Ասում էր, որ ծագումով հայ է, բայց մահմեդական լինելու համար հարազատներն իրենից երես են թեքել: Պատմում էր նաեւ, որ մի եկեղեցուց օգնություն է ստանում: Կարճ ասած` կասկածյալ Մուրադ Նազարյանը հայ չէ, նա միայն ծագումով է հայ», -եզրահանգել է «Հուրիեթ»-ը:

Դեպքի հետ կապված թուրքական ԶԼՄ-ները հայտնել են, թե Մուրադը ոստիկանական բաժանմունք տարվելու ճանապարհին ավտոմեքենայի մեջ ոստիկաններին խոստովանել է, որ հարձակումներն ինքն է կատարել, սակայն ոստիկանական բաժանմունքում առաջին հարցաքննության ժամանակ կտրականապես հերքել է դա:

Ստամբուլի ոստիկանության հայտարարության մեջ նշված է, որ Ֆաթիհ թաղամասում ձերբակալված 40-ամյա կասկածյալը նախկինում դատապարտված է եղել նման հանցագործություններ կատարելու համար: Ըստ ոստիկանության` տարեց կանանց վրա հարձակումները կասկածյալն իրագործել է «կողոպուտի» նպատակով:

Ստամբուլի Սամաթյա թաղամասում առաջին հարձակումը 87-ամյա հայուհի Թուրհանդա Աշըքի վրա տեղի է ունեցել անցյալ դեկտեմբերի սկզբին: Հանցագործը դաժանորեն ծեծել է նրան, ինչի հետեւանքով կինը կորցրել է ձախ աչքը: Երկրորդ հարձակումը կատարվել է դեկտեմբերի 28-ին, որի ժամանակ հանցագործը սպանել է 84-ամյա Մարիցա  Քյուչյուքին եւ վրան դանակով խաչ նկարել: Հաջորդ հարձակումները տեղի են ունեցել հունվարի 6-ին, 22-ին եւ փետրվարի սկզբին: Այդ հարձակումների ժամանակ հանցագործը ծեծել է տարեց կանանց, ինչի հետեւանքով նրանցից մեկը` 83-ամյա Սուլթան Այքարը կորցրել է մի աչքը, իսկ մյուսի աչքը վիրահատել են:

Թուրքական ԶԼՄ-ներն այն ժամանակ հայտնել էին, որ հանցագործը տարեց կանանց թալանելու փորձ չի արել: Բազմաթիվ լրատվամիջոցներ եւ հասարակական գործիչներ կարծիք են հայտնել, որ հանցագործությունները կատարվել են էթնիկ հողի վրա` Հայոց ցեղասպանության 100-ամյա տարելիցին ընդառաջ թուրքական կողմի` հայերին վախեցնելու գործողությունների շրջանակում:

http://armenpress.am/arm/news/710495/nor-manramasner-stambulum-hay—-kananc-vra-hardzakvoxi.html