Վանում «Ուրարտու» թանգարանի կառուցման աշխատանքները կավարտվեն 2013թ. վերջին, հայտարարել է Վանի նահանգապետ Մյունիր Քարալօղլուն, հաղորդում է Haberdiyarbakir.com-ը:
Նահանգապետն այցելել է թանգարանի շինհրապարակ, ուսումնասիրել աշխատանքները և ասել, որ նույնիսկ խիստ ձմռան պայմաններում աշխատանքները չեն դադարեցվել: Քարալօղլուի խոսքով` «Ուրարտուն» լինելու է տարածաշրջանի ամենամեծ թանգարանը:
Նա տեղեկացրել է, որ թանգարանի կառուցումից հետո Թուրքիայի տարբեր շրջաններում պահվող` Ուրարտուի վերաբերյալ հնագիտական գտածոները տեղափոխվելու են թանգարան:
Թանգարանի կառուցման աշխատանքները մեկնարկել են 2012թ. սեպտեմբերին 12-ին Թուրքիայի մշակույթի և զբոսաշրջության նախարարության ֆինանսավորմամբ: Այդ ժամանակվա մշակույթի նախարար Էրթուղրուլ Գունայը հայտարարել էր, որ այն լինելու է Ուրարտուի պատմությանը նվիրված առաջին թանգարանը` ըստ ամենայնի, տեղյակ չլինելով, որ այդպիսին Երևանում վաղուց գոյություն ունի:
Թանգարանի կառուցման աշխատանքներն ավարտին հասցնելու համար նախատեսված է ծախսել 13 մլն թուրքական լիրա:
Leave a Reply