Թուրքական Hurriyet Daily News-ը նյութ է հրապարակել հայաստանցի գնացքավարի մասին, ով արդեն 20 տարի է` սպասում է հայ-թուրքական սահմանի վերաբացմանը: «Արմենպրես»-ի հաղորդմամբ` պարբերականը պատմում է հայ և թուրք ընկերների մասին, ովքեր հայ-թուրքական սահմանի փակման հետևանքով կորցրել էին կապը միմյանց հետ: «1993 թ. Գյումրի-Կարս երկաթուղու շահագործման դադարեցման հետ թե’ հայկական և թե’ թուրքական կողմում մարդկային հուզիչ պատմություններ են կապված»,- գրում է թերթը:
Հակոբ Գևորգյանը երկար տարիներ եղել է Գյումրի-Կարս երկաթուղու գնացքավարը և իր ծառայության ընթացքում հասցրել է բարեկամանալ ու ընկերանալ Շուքրու անունով թուրք գնացքավարի հետ: «Քսան տարի է արդեն` սպասում եմ սահմանի բացվելուն, որպեսզի երկաթուղին կրկին գործարկվի: Սահմանի փակվելուց ի վեր կապը իմ բարեկամ Շուքրույի հետ ընդհատվել է: Շատ էի ցանկանում կրկին տեսնել նրան: Հետագայում նոր իմացա, որ նա մահացել է և խոր ցավ ապրեցի… Ժամանակն է, որ սահմանը կրկին բացվի, ու ես կարողանամ իմ գնացքով էլի գնամ ու գամ Թուրքիա»,- նշել է Գևորգյանը:
1993 թ. Հայաստան-Թուրքիա երկաթուղու աշխատանքների դադարեցումից մինչ օրս Հակոբ Գևորգյանը որպես պահակ աշխատում է Ախուրյանի երկաթուղային կայարանում:
Թուրքիան Հայաստանի հետ դիվանագիտական հարաբերություններ հաստատելու եւ սահմանը բացելու համար առաջ է քաշում մի շարք նախապայմաներ, որոնցից հիմնականը` ղարաբաղյան խնդրի վերջնական լուծումն է: Այդպիսով, Թուրքիան ոտնահարում է ոչ միայն ընդունված միջազգային իրավունքի նորմերը, այլեւ խախտում է 1921թ. Կարսի պայմանագիրը, մասնավորապես որի 17-րդ կետի համաձայն, կողմերը պետք է «…միջոցներ ձեռնարկեն երկաթուղային, հեռագրային եւ հաղորդակցության այլ միջոցների պահպանման եւ զարգացման համար, ինչպես նաեւ ապահովեն մարդկանց եւ բեռների ազատ փոխադրումը»:
http://armenpress.am/arm/news/710331/hay-turqakan-sahmani-pakman-het-mardkayin-bazum-huzich.html
Leave a Reply