Թուրքիայի Բաթման նահանգում զինվորական ծառայության ընթացքում սպանված զինծառայող Սևակ Շահինի Բալըքչըի գործով դատախազի զեկույցը, որում նշվում է, որ Սևակն անզգուշաբար է սպանվել, զայրացրել է Բալըքըչը ընտանիքին. տեղեկացնում է թուրքական «Միլլիյեթ»-ը։
Ընտանիքը պնդում է, որ իրենց որդին դիտավորյալ է սպանվել: Շահինի փաստաբանն էլ նշում է, որ կան վկաներ, ովքեր պատրաստ են վկայություն տալ այն մասին, որ Սևակին դիտավորյալ են սպանել, սակայն դատարանը նրանց լսել չի ցանկանում:
Հիշեցնենք, որ մի քանի օր առաջ Դիարբեքիրի 2-րդ զինվորական դատարանում դատախազը մարդասպան Քըվանչ Աղաօղլուի համար 2-6 տարվա ազատազրկում էր պահանջել՝ եզրակացության մեջ նշելով, որ նա պետք է պատասխանատվության ենթարկվի «անզգուշությամբ մարդ սպանելու» մեղադրանքով:
Սևակի հայրը՝ Կարապետ Բալըքչըն, «Միլլիյեթ»-ին ասել է, որ իր որդու մահը ոչ թե դժբախտ պատահար է, այլ կանխամտածված սպանություն։
«Վճիռն արդար չի լինելու: Դատավարության ընթացքում մեր ոչ մի պահանջ չիրականացավ։ Մենք պահանջում էինք, որ ականատեսները դարձյալ խոսեն։ Մենք ասացինք, որ մեր որդուն ծեծել են: Դատարանը մեզ չի լսում, իսկ դատախազի կարծիքը, թե դա դժբախտ պատահար է եղել, մեզ վիրավորում է: Սևակն սպանվել է հայ լինելու համար, այդ սպանությունը ազգային խտրականության հողի վրա է տեղի ունեցել: Այդ օրը մի հայ պետք է սպանվեր, և դա իմ որդին եղավ»,-ասել է Կարապետ Բալըքչըն։
Սևակի մայրը՝ Անի Բալըքչըն, իր հերթին հայտարարել է, թե իր որդու սպանությունը դժբախտ պատահար որակելն ամոթ է։
«Թող չստիպեն այս հարցը լուծել այլ երկրներում, հակառակ դեպքում կդիմեմ Մարդու իրավունքների եվրոպական դատարան»,-ասել է նա։
Բալըքչը ընտանիքի փաստաբան Ջեմ Հալավութն իր հերթին նշել է, որ այդ դատավարության ընթացքում վկայությունները լսելը շատ կարևոր է։
«Մենք նշեցինք, որ վկաներին լսելիս նրանց ցուցմունք տալը խոչընդոտվել է, սակայն մեր բոլոր պահանջները մերժվեցին: Մենք ապացույցներ ունենք, որ Սևակին միտումնավոր են սպանել։ Դատախազն այդ եզրակացությունը պատրաստել է՝ առանց մանրամասն տեղեկություններ ունենալու»,-ասել է փաստաբանը։
Հիշեցնենք, որ Սևակ Շահին Բալըքչըն սպանվել էր 2011թ. ապրիլի 24-ին՝ զինվորական ծառայության ընթացքում։
Մարդասպան Քըվանչ Աղաօղլուն դատավարության ընթացքում ստորագրությամբ ազատ էր արձակվել և պնդում էր, թե ինքն ու Սևակն ընկերներ են եղել, և միտումնավոր չի սպանել վերջինիս։
Սևակի ընտանիքը, սակայն, այդ վարկածին չի հավատում և հենց այդ օրը հայազգի զինծառայողի սպանությունը պատահական չի համարում։
Leave a Reply