Ստամբուլում տարեց հայուհիների վրա հարձակվողը հա՞յ է

Ստամբուլի Սամաթյա թաղամասում տարեց հայ կանանց դեմ հարձակումներն իրականացրած անձն ազգությամբ հայ է:

Նման տեղեկություն է տարածել թուրքական «Ռադիքալ» պարբերականը:

Ստամբուլի ոստիկանությունը ձերբակալել է 40-ամյա տղամարդու, ում անունն է Մուրադ Նազարյան: Դեպքի վերաբերյալ մանրամասներ չեն նշվում: Պաշտոնական հայտարարություններ դեռ չկան:

Նշվում է, որ բացի հայուհիների վրա հարձակումներից, տղամարդը կասկածվում է նաև թուրք կանանց նկատմամբ բռնություն գործադրելու մեջ:

Հիշեցնենք, որ դեկտեմբեր և հունվար ամիսներին Ստամբուլի Սամաթյա թաղամասում, որտեղ շատ են հայ համայնքի ներկայացուցիչները, անհայտ անձանց/անձի կողմից հարձակման էին ենթարկվել տարեց հայուհիներ:

Նոյեմբերի 28-ին դաժան ծեծի էր ենթարկվել 87-ամյա Թուրֆանդա Աշըքը, ով կորցրել էր մեկ աչքը, դեկտեմբերի 28-ին սեփական բնակարանում դանակի 8 հարվածով սպանվել էր 84-ամյա Մարիցա Քյուչյուքը. նրա որդու խոսքերով` մոր մարմնին արյունով խաչ էր պատկերված, հունվարի 6-ին` Սուրբ Ծննդյան օրը, եկեղեցի գնալու ճանապարհին 3 անձինք ավտոմեքենայով փորձել էին առևանգել տարեց մի հայուհու, սակայն նա կարողացել էր փրկվել, հունվարի 22-ին բնակարանի մուտքի մոտ անհայտ անձի կողմից դաժան ծեծի էր ենթարկվել 83-ամյա Սուլթան Այքարը, ով կորցրել էր մեկ աչքը:

Թուրքական ոստիկանությունն այս սպանության և հարձակումների հետ կապված որևէ անձի չի ձերբակալել: Ստամբուլի հայ համայնքում ներկայում վախի մթնոլորտ է:

http://haynews.am/hy/1362390712