Հրանտ Դինքի ընտանիքի փաստաբանները պահանջում են բացահայտել նրա սպանության հետեւում կանգնած հանցախմբին

Ստամբուլում սպանված «Ակօս» թերթի հայազգի խմբագրապետ Հրանտ Դինքի ընտանիքի փաստաբանները Ստամբուլի հանրապետական գլխավոր դատախազությունից պահանջել են հարցաքննել Դինքի մահափորձի ժամանակաշարջանում Տրապիզոնի նահանգապետ Հուսեին Յավուզդեմիրին, ով մամուլին արած հայտարարություններում եւ թուրքական խորհրդարանի մարդու իրավունքների ստորին հանձնաժողովի կողմից հարցաքննության ժամանակ ակնարկել էր այն մասին, որ սպանության հետեւում կազմակերպված հանցավոր խումբ է կանգնած: Այս մասին, ինչպես հաղորդում է «Արմենպրես»–ը, հայտնում է թուրքական bianet.org լրատվական կայքը:

Հրանտ Դինքի սպանության բացահայտման հարցով Թուրքիայի խորհրդարանի կողմից ստեղծված հանձնաժողովին տված ցուցմունքում Յավուզդեմիրն ասել էր, որ իր պաշտոնավարման ժամանակաշրջանում Տրապիզոնի անվտանգության տնօրենի եւ ժանդարմերիայի հրամանատարի մասնակցությամբ կանոնավոր կերպով նիստեր է գումարել, որտեղ նրանք իրեն զեկույցներ չեն ներկայացրել Դինքի սպանության եւ այդ գործով անցնող Յասին Հայալի գործունեության մասին, եւ որ ինքը տեղյակ չի եղել Դինքի դեմ մահափորձ կազմակերպվելու մասին 2006 թ. Տրապիզոնի քաղաքային անվտանգության տնօրինության կողմից Ստամբուլի քաղաքային անվտանգության տնօրինությանն ուղարկված գրության մասին:

Թուրքական մամուլում այն ժամանակ տեղ գտած լուրերի համաձայն եւս Յավուզդեմիրը, խոսելով Դինքի դեմ մահափորձ կազմակերպվելու պատրաստությունների մասին, ասել էր, որ եթե տեղեկացված լիներ, ապա որպես պետությունը ներկայացնող նահանգապետ, ամեն բան կաներ այն կանխելու համար: «Տրապիզոնում տեղի ունեցած իրադարձություններն, իհարկե, մեծացրին իմ աշխատանքային փորձառությունը, ինչի արդյունքում հետագայում ավելի լավ կարողացա գնահատել պետության ներսում հակապարտիզանական ակտիվությունը: Կարծում եմ, որ Տրապիզոնում տեղի ունեցած իրադարձությունները պատահական չեն եւ նախապատրաստվել են պետության ներսում բնավորված հակապարտիզանության կողմից», -ասել էր նա: Հրանտ Դինքի ընտանիքի փաստաբանները դատախազությունից պահանջել են հարցաքննել Յավուզդեմիրին նրա արած հենց այդ արտահայտությունների համար:

Տրապիզոնի նախկին նահանգապետը թուրքական խորհրդարանում ունեցած զրույցում կարծիք էր հայտնել, որ հանցագործությունը հնարավոր է իրագործված լինեն ինչ-որ «քաղաքական կազմակերպության» կողմից: «Դինքի սպանությունից հետո շտապ անցկացված նիստում Տրապիզոնի` այն ժամանակվա ոստիկանապետը, ժանդարմերիայի հրամանատարը եւ Ազգային հետախուզական կազմակերպության Տրապիզոնի վարչության պետը հայտարարեցին, որ դա կազմակերպված հանցագործություն չէ, սակայն, ես կարծում եմ, որ միջադեպը մեծ պարտիզանական ջոկատի գործ է, ինչի մասին նույն օրը մամուլով հանդես եմ եկել հայտարարությամբ: Այդ մասին ժամանակին տեղեկացրել եմ Ներքին գործերի նախարարությանը, ասել եմ նաեւ, որ Դինքի նպատակային սպանության հետեւում հնարավոր է քաղաքական ապօրինի կազմակերպություն է կանգնած, ինչի մասին է խոսում նաեւ այն, որ մահափորձի անմիջական իրականացնողների եւ նրանց շրջապատի հետ միասին կալանվել է եւս 16 մարդ», -պատգամավորներին ասել էր Յավուզդեմիրը:

Ստամբուլի «Ակօս» թերթի խմբագրապետ Հրանտ Դինքը սպանվել է 2007 թ. հունվարի 19-ին:

http://armenpress.am/arm/news/710004/hrant-dinqi-yntaniqi-pastabannery-pahanjum-en-bacahaytel.html