Թուրք դատախազը պահանջել է Սևակ Բալըքչըին սպանողին դատել «անզգուշաբար մարդ սպանելու» հոդվածով

Թուրքիայի Բաթման նահանգում զինվորական ծառայության ընթացքում 2011թ. ապրիլի 24-ին սպանված Սևակ Շահին Բալըքչըի գործով դատական հերթական՝ արդեն 13-րդ նիստն է տեղի ունեցել։
Ինչպես տեղեկացնում է «Ակօս»-ը, դատական նիստի ընթացքում դատախազը կարդացել է վերջնական եզրակացությունը և պահանջել մարդասպան Քըվանչ Աղաօղլուին դատել «անզգուշաբար մարդ սպանելու» մեղադրանքով։
Դատախազը պահանջել է 3-9 տարվա ազատազրկում։
Հաջորդ դատական նիստը տեղի կունենա մարտի 26-ին, և ենթադրվում է, որ այդ ընթացքում կընթերցվի դատավճիռը։

Դատախազի կարծիքը լսած Բալըքչըի ընտանիքը խորը հիասթափություն է ապրել և պահանջում է պարզել սպանության իրական պատճառները։
«Ցանկանում ենք, որ ճշմարտությունը բացահայտվի։ Մինչ այժմ ոչինչ չբացահայտվեց։ Որդուս ինչո՞ւ են սպանել»,-ասել է Սևակի հայրը՝ Կարապետ Բալըքչըն։

Մինչ դատական նիստը Սևակ Շահին Բալըքչըի հիշատակին նվիրված ակցիա է տեղի ունեցել։ «Սևակին չենք մոռանալու և թույլ չենք տալու, որ մոռանան»,-ասել են մասնակիցները։

http://tert.am/am/news/2013/03/01/sevag-balikci/