«Հրանտ Դինք» հիմնադրամը լույս է ընծայել «Ստամբուլի հայկական բռնագրավված գույքը» աշխատությունը, հաղորդում է թուրքական Bianet կայքը:
Գրքում ներկայացվում է Ստամբուլում հայկական եկեղեցիների, դպրոցների և այլ անշարժ գույքի բռնագրավման պատմությունը, ինչպես նաև` այն դեպքերը, երբ պոլսահայերին հաջողվել է հետ վերադարձնել նախկինում իրենց պատկանած գույքը:
Գրքում բերված տեղեկությունների համաձայն` Ստամբուլի հայկական հիմնադրամներին (վաքըֆ) էր պատկանում 1328 միավոր անշարժ գույք, որի կեսը, տարբեր պատճառաբանություններով, պետությունը բռնագրավել էր: 10 տարիների ընթացքում բռնագրավված գույքից ընդամենը 143-ն է վերադարձվել հայկական հիմնադրամներին:
Գրքում ներկայացվում է նաև, թե ինչպես է հայկական այս կամ այն շինությունը վերադարձվել տերերին: Խոսքը, մասնավորապես, Փերայում գտնվող Մխիթարյան հայկական արական նախակրթարանի մասին է, որը կառուցվել է 1830թ.: Հետագայում այն ստացել է Բոմոնթիի կաթոլիկ հայկական նախակրթարան անունը: 2012թ. նոյեմբերին հայկական հիմնադրամը երկարատև պայքարից, դատական քաշքշուկներից հետո կարողացել է դպրոցը վերադարձնել հայկական համայնքին:
«Ստամբուլի հայկական հիմնադրամների բռնագրավված գույքը» աշխատության համաձայն` ներկայում Ստամբուլում գոյություն ունեն 48 հայկական եկեղեցի, 18 հայկական դպրոց, երկու հայկական հիվանդանոց և 20 հայկական գերեզմանատուն: Դպրոցներում, ընդհանուր առմամբ, սովորում է 3139 աշակերտ: Փակվել է հայկական 10 եկեղեցի, 34 հայկական դպրոց:
Leave a Reply