Թուրքիայի պատմության ընթացքում առաջին օմբուդսմենի պաշտոնին Նիհաթ Օմերօղլուի ընտրությունը դժգոհություն է առաջացրել Ստամբուլի «Ակօս» շաբաթաթերթի նախկին խմբագրապետ Հրանտ Դինքի եղբոր` Օրհան Դինքի մոտ: Նիհաթ Օմերօղլուն Հրանտ Դինքի դեմ Քրեական օրենսգրքի 301-րդ հոդվածի (թրքությանը վիրավորանք) հատկանիշներով որոշում ընդունած դատավորների թվում էր:
Ինչպես գրում է թուրքական ensonhaber.com-ը, Օրհանը հիշեցրել է, թե ինչպես տարիների առաջ նորընտիր օմբուդսմենը մյուս 18 դատավորների հետ միասին Թուրքիայի ՔՕ 301-րդ հոդվածի հատկանիշներով սխալ որոշում էր կայացրել Հրանտ Դինքի դեմ` կապված վերջինիս հրապարակման հետ:
«Մենք գիտենք, որ տարիներ առաջ թուրքական արդարադատության ընդունած որոշումը դարձավ Դինքի մահվան հրամանը: Ընդ որում, այս որոշմամբ դատարանը ոչ միայն վատ դրության մեջ գցեց Թուրքիային, այլև մեր եղբորը վերցրեց մեզանից: Որպես արդյունք` դատական գործը հասավ ՄԻԵԴ: Եվրոպական դատարանը Դինքի հրապարակումը որակեց իբրև խոսքի ազատություն, որտեղ չկային թուրքերին նվաստացնող և վիրավորող տարրեր»,-ասել է Դինքի եղբայրը` ընդգծելով, որ փաստացիորեն Թուրքիայի օմբուդսմեն է ընտրվել մեկը, ով ստորագրել է Հրանտ Դինքի մահվան հրամանագիրը:
Leave a Reply