Վրաստանում մի քաղաքացիական-հասարակական կազմակերպության կողմից առաջարկ է հնչել` «Հետ վերցնել չերքեզների ցեղասպանության մասին որոշումը և ճանաչել Հայոց ցեղասպանությունը»: Նման կոչով է հանդես եկել վրացի քաղաքական գործիչ, «Իրակլի Երկրորդի հավաքականություն» քաղաքացիական-հասարակական կազմակերպության նախագահ Արչիլ Չքոիձեն:
Այդ մասին, ըստ Akunq.net-ի, հաղորդում են թուրքական լրատվամիջոցները` հղում անելով «Կավկազ» լրատվական գործակալությանը: Աղբյուրի համաձայն` Արչիլ Չքոիձեն ընդգծելով, որ Հայոց ցեղասպանությունը ճանաչվել է ԵՄ-ի, Ֆրանսիայի, Գերմանիայի և Շվեյցարիայի կողմից, և անգամ որոշ երկրներ Ցեղասպանությունը ժխտողների դեմ դատական հետապնդում իրականացնելու մասին որոշումներ են ընդունել, նշել է. «Ես ուզում եմ, որ Վրաստանը ճանաչի Հայոց ցեղասպանությունը: Դա անհրաժեշտ է արդարության վերականգնման համար: Ավելին` աշխարհի կեսն ընդունել է այդ ցեղասպանությունը: Վրաստանում են ապրում այն 300 հազար հայերը, որոնց պապերը Ցեղասպանության զոհ են դարձել»:
Չքոիձեն նաև պնդելով, թե չերքեզների ցեղասպանության մասին որոշումը կայացվել է մեկ հոգու ժամանակավոր ցանկությամբ, ասել է. «Մեր երկրում կայացված յուրաքանչյուր լուրջ որոշման նման, այս որոշումը ևս ընդունվել է մեկ կամ երկու հոգու ժամանակավոր ցանկության հիման վրա` առանց գիտականորեն ուսումնասիրվելու: Նախկին կառավարությունն ընդամենը նպատակ է հետապնդել` հրահրելու Ռուսաստանի իշխանություններին»:
Չքոիձեն իր այդ տեսակետը հիմնավորել է այն փաստարկով, թե չերքեզների ցեղասպանությունը չի ճանաչվել այլ երկրների կողմից: Այնինչ, ինչպես նշել է վրացի քաղաքական գործիչը, Հայոց ցեղասպանությունն ընդունվել է ԵՄ-ի և մի շարք այլ երկրների խորհրդարաններում:
Akunq.net
Leave a Reply