Ինչո՞ւ է Էրդողանը հպարտանում եղբայրասպան եւ մանկասպան արյունոտ օսմանյան սուլթաններով

Թուրքիայի վարչապետ Ռեջեփ Թայիփ Էրդողանը մի միջոցառման ժամանակ հայտարարել էր, թե խիստ քննադատում է թուրքական եթերի աստղ համարվող «Փառահեղ դարաշրջան» հեռուստասերիալը, քանի որ այնտեղ ճիշտ չի ներկայացվում իր նախնու՝ սուլթան Սուլեյմանի կյանքը։  Էրդողանը նշել է, թե Սուլեյմանը սերիալում ներկայացվածի պես պալատում չի անցկացրել իր ժամանակը, այլ 30 տարի ձիու վրա է անցկացրել։

Քրդական ANF գործակալության լրագրող Ջահիթ Մերվանն անդրադարձել է Օսմանյան կայսրության սուլթաններին, որոնցով հպարտանում է վարչապետ Ռեջեփ Թայիփ Էրդողանը։

«Էրդողանը ճիշտ է ասում, թե ինքը հեռուստասերիալում ներկայացված սուլթաններին չի ճանաչում։ Իրոք, սուլթանները հեռուստասերիալներում ներկայացվածի պես անմեղ չէին։ Բոլորն էլ հայրասպան, որդեսպան, եղբայրասպան սուլթաններ են եղել։ Ոչ մի սուլթան իր գնացած երկրում, բացի արյունից, արտասուքից եւ ավերումներից, ոչ մի ժառանգություն չի թողել։

Օրինակ՝ Էրդողանի նշած նախնին՝ սուլթան Սուլեյմանը, խեղդել է իր 2 որդիներին եւ թոռներին։ Արի ու հպարտացիր։ Բացի այդ` սպանել է իր իշխաններին ու 2 վեզիրներին։

Սուլեյմանը, որով հպարտանում է Էրդողանը, բացառություն չէ։ Օսմանյան կայսրությունում բացառություն կլիներ, եթե սուլթանն իր մահով մահանար կամ չսպաներ մեկ այլ ազգականի։ Իսկ այդ բացառությունը երբեք տեղի չունեցավ։

Օսմանյան կայսրության հիմնադիր Օսմանը իշխանությունը վերցնելու համար առաջին գործը, որ արեց, սպանեց մորեղբորը՝ Դյունդարին։

Օրինակ՝ Էրդողանի կողմից շատ գովասանքների արժանացած եւ 1453-ին Բյուզանդիայի մայրաքաղաքը՝ Կոնստանդնուպոլիսը, զավթած սուլթան Մեհմեդը, առանց խղճի խայթ զգալու, սպանեց իր 2 տարեկան եղբորը, որ հանկարծ նա հետագայում իրենից գահը չխլի։ Մեհմեդը ջախջախել է նաեւ իր 2 մեծ վեզիրների գլուխները։

Իսկ Մուրադ 3-րդն իրար հետեւից խեղդեց իր 5 եղբայրներին։ Նա իր անթիվ կանանցից, որոնցից ոչ մեկը թուրք չի եղել, ունեցել է 110 երեխա։ Մի՞թե այդ երեխաներին ձիու վրա նստած էր ստեղծում։

Եղբայրներին սպանելու քանակով Մուրադ 3-րդի ռեկորդը ձեռքից վերցրեց Մեհմեդ 3-րդը՝ 8 տարվա մեջ սպանելով 19 եղբայներին եւ իր երեխային։ Մի մասին կացնով էր սպանել տալիս, մի մասին՝ թունավորում, մյուսին գցում պարկի մեջ եւ նետում Մարմարա ծովը։

Մեկ այլ օրինակ՝ Էրդողանի գովելի Օսման 2-րդի առաջին գործը` գահին բարձրանալուց հետո, եղավ խեղդել եղբորը, սակայն մի քանի տարի անց իրեն էլ վայր գցեցին։ Նրան բռնաբարեցին եւ սպանեցին ենիչերիները։

Օրինակ՝ Մուրադ 4-րդը երբ բարձրացավ օսմանյան գահին, 11 տարեկան էր։ Չբավարարվելով 3 եղբայներին սպանելով` նա նոր ռեկորդ է սահմանել՝ սպանելով 6 մեծ վեզիրների։

Էրդողանի սիրելի արյունոտ ու փառավոր սուլթաններից վեջին օրինակը բերեմ։ Մահմուդ 2-րդը 23 տարեկանում պարտադրված գահին նստեց, քանի որ պալատում տղա միայն նա եւ նրա եղբայրն էին մնացել։ Մահմուդ 2-րդի առաջին գործը եղավ իր եղբոր գլուխը թռցնելը։ Չգիտենք, թե նա Էրդողանի ասած 30 տարին ձիու վրա՞ է անցկացրել, թե՞ պալատում, բայց 18 կնոջից ունեցել է 44 երեխա։ Իսկ այդքան երեխա ինչպե՞ս ունենալ ձիու վրա նստած։

Մահմուդ 2-րդն արյան մեջ ճնշեց ենիչերիների խռովությունը։ Նա զորանոցներում այրեց ենիչերիներին, հրապարակում կտրեց նրանց գլուխները։ Արյունոտ արշավանքներ իրականացրեց Բալկաններ։

Ահա այն ամենը, ինչով հպարտանում է Էրդողանը՝ արյուն, արցունք, բռնազավթում, թալան, ստրկություն, կոտորած, բռնաբարություն, պալատական խարդավանքներ։

Եւ չպետք է մոռանալ, որ Բալկաններում, Հյուսիսային Աֆրիկայում, Մերձավոր Արեւելքում մայրերն իրենց երեխաներին վախեցնելու համար օգտագործում են «թուրքերը գալիս են» արտահայտությունը։

Ի՞նչ ասենք։ Աստված մեզ նման ամոթալի նախնիներից հեռու պահի»,-գրել է Ջահիթ Մերվանը։ 

http://news.am/arm/news/130068.html