Նախիջևանում հակակառավարական թերթոնների պատճառով արտակարգ իրավիճակ է գործում. ԶԼՄ-ներ

Ադրբեջանի տարածքում գտնվող Նախիջևան ինքնավար մարզում, առանց հայտարարվելու, գործում է արտակարգ իրավիճակի ռեժիմ, հաղորդում են տեղի բնակիչները: Պատճառը Նախիջևան քաղաքում տարածված թերթոններ են, որոնցում սպառնալիքներ կան մարզային իշխանությունների հասցեին, հաղորդում է regnum.ru-ն:
Իրավապաշտպանները հայտարարում են իրավապահ մարմինների գործողություններով պայմանավորված մարդու իրավունքի խախտումների մասին, գրում է Кавказский узел պարբերականը:
Թերթոնները, որոնց վրա գրված է. «Եկել է ձեր վերջը: Դուք շուտով կվռնդվեք», հայտնվել են մեկ ամիս առաջ` ստորագրված «Հայրենասիրական եղբայրներ»: Դրանք տարածվում են հիմնականում այն շրջաններում, որտեղ տեսահսկման խցիկներ չկան:
Թերթոնների հայտնվելուց հետո տեղի բնակիչները հայտնել են, որ ինքնավարության իրավապահներն անցել են աշխատանքի ուժեղացված ռեժիմի: Փողոցները և ճանապարհները վերահսկվում են ոստիկանության և քաղաքացիական հանդերձանքով հատուկ ծառայությունների աշխատակիցների կողմից: Կանգնեցնում և ստուգում են յուրաքանչյուրին, ով որևէ կասկած է հարուցում: Միևնույն ժամանակ, ոստիկանությունը բնակիչներին խորհուրդ չի տալիս 23:00-ից հետո տնից դուրս գալ, մինչև առավոտ:

Ադրբեջանի Ազգային ճակատ կուսակցության փոխնախագահ Ասեֆ Հուսեյնովը կարծում է, որ Նախիջևանում մարդու իրավունքների և ժողովրդավարության ճնշման պատճառով քաղաքացիներն իրենց բողոքի արտահայտման այլ ձևեր են փնտրում, և նման ձևերից մեկն է թերթոնների տարածումը: Ղեկավարությունը խախտում է մարդու իրավունքները. խոսքի և մամուլի ազատություն չկա:
Սակայն Ադրբեջանում հասարակաքաղաքական իրավիճակը արդեն փոխվում է: Ժողովուրդը այլևս իշխանությունից դրական քայլեր չի սպասում և սկսում է պայքարել իր իրավունքների համար:

Նախիջևանում «շատ կարևոր իրադարձություններ» կարող են տեղի ունենալ, կարծում է Ադրբեջանի ժողովրդավարական կուսակցության նախագահ Սարդար Ջալալօղլուն: Նա կարծում է, որ ժողովրդի ակտիվացման պարագայում տեղական իշխանությունը չի կարողանա դիմագրավել բողոքներին: «Մինչ այժմ այնտեղ բնակչության ակտիվություն չի եղել, և տեղական իշխանությունը կարծում էր, որ ինքը շատ ուժեղ է: Սակայն այժմ ժողովուրդը ծայրահեղ եզրագծի առջև է և այլևս չի կարող ճնշման տակ ապրել», – ասել է քաղաքական գործիչը:
Պարբերականը նշում է, որ ադրբեջանական իրավապաշտպանները և միջազգային իրավապաշտպան կազմակերպությունները բազմիցս հայտարարել են Նախիջևանում մարդու իրավունքների ոտնահարման մասին:
Այդ մասին նաև ասվում է 2012թ. հոկտեմբերին հրապարակված նորվեգական «Մարդու իրավունքների տուն» հիմնադրամի զեկույցում, որը կազմվել է Ադրբերջանում մարդու իրավունքների իրավիճակի վերաբերյալ ՄԱԿ-ի երկրորդ պարբերական զեկույցի շրջանակներում:
Այդ խնդրին է նվիրված «Նորվեգական Հելսինկյան կոմիտե» իրավապաշտպան կազմակերպության կողմից Եվրոպայի Խորհրդի համար 2010 թ. նախապատրաստած` Նախիջևանի ինքնավար հանրապետությունում մարդու իրավունքների ոտնահարման մասին զեկույցը, որը կոչվում է «Ադրբեջանի «Սև կղզի». մարդու իրավունքների խախտումը Նախիջևանում»:
Իրենց հերթին ադրբեջանական իշխանությունները կարծում են, որ ինքնավարությունում իրավիճակը ներկայացված է խեղաթյուրված և կանխակալ ձևով:

http://tert.am/am/news/2012/11/25/nakhijevan/