Բաշկիրիայի ԱԺ փոխնախագահն այցելել է Ծիծեռնակաբերդի հուշահամալիր

Նոյեմբերի 24-ին Երևանում գտնվող Բաշկիրիայի ԱԺ նախագահի տեղակալ Ռաֆայիլ Զինուրովը ՀՀ ԱԺ փոխնախագահ Էդուարդ Շարմազանովի ուղեկցությամբ այցելել է Ծիծեռնակաբերդի հուշահամալիր։
Բաշկիրիայի Աժ փոխնախագահը ծաղիկներ դրեց Հուշապատի մոտ գտնվող Արցախյան հերոսամարտի ազատամարտիկների շիրիմներին, 1915թ. Հայոց մեծ եղեռնի հուշակոթողին, լռությամբ ու խոնարհումով հարգել անմեղ զոհերի հիշատակը։

«Արդեն չորրորդ անգամ եմ Հայաստանում և յուրաքանչյուր անգամ մեծ ցավ եմ ապրում լինելով Ծիծեռնակաբերդում: Այս հուշահամալիրը ոչ միայն հայ ժողովրդի համար է սրբավայր, այլև ողջ մարդկության։ 1915 թվականին տեղի ունեցածը մեծագույն կորուստ է Հայաստանի և ողջ հայության համար։ Ես գտնում եմ, որ Հայոց ցեղասպանությունը պետք է ճանաչվի ամբողջ աշխարհի կողմից»,-լրագրողներին ասել է Ռաֆայիլ Զինուրովը:

ՀՀ ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին հայտնում են, որ Բաշկիրիայի խորհրդարանի փոխնախագահը եղել է նաև Հայոց ցեղասպանության թանգարան-ինստիտուտում, ծանոթացել Հայոց մեծ եղեռնը հավաստող վավերագրերին ու փաստաթղթերին, գրառում է կատարել Հուշամատյանում. «Բառեր չեմ գտնում։ Խորապես ցնցված եմ։ Երկնային արքայություն բոլոր նահատակվածներին։ Հայաստան, հայեր՝ բաշկիրները, Բաշկիրիան Ձեզ հետ են»։

http://1in.am/arm/armenia_society_135463.html