NEWS.am-ը հատված է ներկայացնում «The New York Times»-ում հրապարակված` Թուրքիայում քուրդ նկարիչ Ահմեդ Գյունեշթեքինի ցուցահանդեսի մասին պատմող հոդվածից.
Մինչ Ահմեդ Գյունեշթեքինի` Անատոլիայի մշակութային բազմազանությանը նվիրված ցուցահանդեսի վառ գույներին ծանոթանալը, այցելուներն անցնում են զոհերի սգո խավարի միջով: Մութ սենյակում տեսաինստալացիայի միջոցով ներկայացվում են անցած դարի ընթացքում Թուրքիայում իրականացված զանգվածային սպանությունների տարեթվերը:
1909 եւ 1915 տարեթվերի միջեւ լսելի են հայկական ձայները, որոնց հաջորդում են քրդերի, հույների, ալեւիների եւ այլոց հեծեծանքները: Վերջին տարեթիվը 2012թ. է. մայրերը թուրքերեն եւ քրդերեն լեզուներով սգում են իրենց զավակների մահը, ովքեր սպանվել են Թուրքիայի եւ քուրդ ապստամբների միջեւ շարունակվող պատերազմում:
«Ցանկանում եմ, որ այցելուները տուրք մատուցեն այն ժողովուրդներին, որոնք ոգեշնչել են իմ արվեստը, մինչ նրանք կդիտեն ցուցադրությունը: Սա Թուրքիայի իրականությունն է, այստեղ շատ մեղքեր են իրագործվել: Մենք պետք է պատրաստ լինենք դիմավորել դա»,-ասել է նա Ստամբուլում իր հարցազրույցներից մեկում:
«Yüzleşme» («Առերեսում») խորագրով ցուցահանդեսը բացվել է Ստամբուլի «Անտրեպո» ցուցասրահում եւ կտևի մինչեւ դեկտեմբերի 30-ը:
Leave a Reply