Թուրքական Anadolu գործակալությունը Կարսը ներկայացնելիս միտումնավոր չի օգտագործել «հայ» բառը

Թուրքական Anadolu լրատվական գործակալությունը Կարսի հայկական Առաքելոց եկեղեցու վերաբերյալ հերթական նյութն է հրապարակել, որտեղ, ցավոք, կրկին բացակայում է «հայ» կամ «Հայաստան» բառը, երբ խոսքը Հայաստանի պատմական մայրաքաղաքի մասին է։

Թուրքական առաջին պետական լրատվական գործակալության՝ Anadolu լրատվական գործակալության Հուսեյն Դեմիջի անունով թղթակիցը հրապարակում է տեղադրել Կարսի հայկական Առաքելոց եկեղեցու նկատմամբ զբոսաշրջիկների հետաքրքրության ավելացման մասին, սակայն հայկական եկեղեցին ներկայացնում է որպես «գմբեթավոր մզկիթ»։

Եւ ինչպես պատմական Հայաստանի մյուս վայրերի շուրջ են կոպիտ ձեւով խեղաթյուրվում պատմական փաստերը, Կարսում եւս այն նույն ձեւով շարունակվում է։ Թուրք լրագրողը, չնշելով «հայ» կամ «Հայաստան» բառերը, եկեղեցու կառուցման վերաբերյալ ասում է, թե այն կառուցել է Աբաս Բագրատունի թագավորը՝ միտումնավոր թաքցնելով Բագրատունիների հայ լիենլը։

Թուրք լրագրողի հետ հարցազրույցում Կարսի մշակույթի եւ տուրիզմի նահանգային կառույցի ղեկավար Հաքան Դողանն իր խոսքում նշելով, թե Կարսի նկատմամբ զբոսաշրջիկների հետաքրքրությունը մեծանում է, պնդել է, թե Կարսում զբոսաշրջիկները հիմնականում այցելում են Բերդի թաղը, որտեղ գտնվում են սելջուկներին, օսմաններին, ռուսներին եւ Բագրատունի թագավորներին պատկանող մի շարք արժեքներ։ 

Թուրք պաշտոնյան այստեղ եւս միտումնավոր չի շեշտել «հայկական» անունը, բավարարվելով միայն «Բագրատունի» բառն ասելով, որը դժվար թե որեէ թուրքի մտքով անցի, թե այն հայկական թագավորական դինաստիա է, եթե այդ թուրքը տեղյակ չէ իրական պատմությանը։

Արթուր Հակոբյան

http://news.am/arm/news/129448.html