Հայոց ցեղասպանության մասին «Իմ մայրիկի ձայնը» ֆիլմն ԱՄՆ-ում էկրաններ կբարձրանա դեկտեմբերին

Ամերիկահայ կինոգործիչ Քեյ Մուրադյանի «Իմ մայրիկիս ձայնը» փաստավավերագրական ֆիլմը մեծ էկրաններ կբարձրանա դեկտեմբերի 1-ին: Ֆիլմի պրեմիերան կկայանա Լոս Անջելեսի «Եգիպտական» կինոթատրոնում: «Արմենպրես»-ի փոխանցմամբ` այս մասին գրում է southpasadena.patch կայքը:

«Քեյ Մուրադյանը մեծացել է Բոստոնում: Մանուկ հասակում նա մեծ ուշադրություն չէր դարձնում իր մայրիկի ողբերգական պատմություններին, որոնք 1915 թվականի Հայոց ցեղասպանության օրերին ընտանիքի բոլոր անդամների կորցնելու մասին էին: Քեյը պարզապես ցանկանում էր ամերիկացի իր հասակակիցների նման լինել: Իսկ ահա արդեն չափահաս տարիքում Հարավային Փասադենայում ապրող ֆիլմ արտադրողը կարծում է. «Իմ մոր ձայնը լսելի դարձնելը, ինչպես նաեւ այն միլիոնավոր մարդկանց ձայները, ովքեր կոտորվեցին Առաջին համաշխարհային պատերազմի տարիներին, իմ պարտականությունն է»»,-գրում է ամերիկյան կայքը:

Ֆիլմում Մուրադյանը պատմում է Ֆլորա Մանուշյանի կյանքի պատմությունը եւ նկարագրում է 1900-ական թվականների Օսմանյան Թուրքիայի հայերի վիճակը: Հայազգի «Աննա Ֆրանկն» իր ընտանիքի անդամներին կորցրել է 1915թ. Հայոց ցեղասպանության ժամանակ եւ կյանքն ապրել է այդ մասին հիշողություններով:

«Ֆլորայի անհավանական պատմությունն արժանիորեն մեծարում է նրա ժողովրդին եւ հույսի, սիրո եւ արդարության ոգի սերմանում: Ֆլորայի ձայնը Հայոց ցեղասպանության զոհերի եւ ցեղասպանությունից մազապուրծ եղածների ձայնն է. պատմություն, որը երբեք չպետք է մոռացվի»,-նշված է ֆիլմի ազդագրում: 

«Իմ մայրիկի ձայնը» ֆիլմը ներկայացվել է Լոս Անջելեսի «ԱՐՓԱ» կինոփառատոնին, իսկ հոկտեմբերին Տորոնտոյի «Նուռ-2012» կինոփառատոնին արժանացել է «Խրախուսական մրցանակի»:

http://armenpress.am/arm/news/700146/