Ստամբուլի Մեջիդիյեքյոյ թաղամասում գտնվող հայ կաթոլիկ գերեզմանատան սեփականության վկայականը 82 տարի անց վերադարձվում է հայերին:
Այդ մասին հաղորդում է Akunq.net-ը` հղում անելով թուրքական «Հաբերթյուրք» լրատվամիջոցին: Ըստ աղբյուրի` Վաքըֆների գլխավոր վարչությունը թույլ է տվել Ստամբուլի Մեջիդիյեքյոյ թաղամասում գտնվող և 40 հազար 500 քմ տարածք զբաղեցնող հայ կաթոլիկ գերեզմանոցի սեփականության վկայականը գրել Սուրբ Հակոբ հիվանդանոցի վաքըֆի անունով: Օսմանյան կայսրության կողմից 1830-ական թվականներին որպես գերեզմանոց օգտագործված սույն տարածքը, մի ֆերմանի (կայսերական հրովարտակ) համաձայն, տրվել էր հայերին: Սակայն 1930 թ. հրապարակված Քաղաքապետարանի օրենքի շրջանակներում` այն փոխանցվել էր Ստամբուլի քաղաքապետարանին: Թեև այդուհետ սույն գերեզմանատան սեփականության վկայականն այլևս պոլսահայերի ձեռքին չէր, սակայն նրանք մինչ օրս շարունակում էին իրենց հանգուցյալներին այդ գերեզմանոցում ամփոփել:
Սուրբ Հակոբ հիվանդանոցի վաքըֆը, վաքըֆների մասին նոր օրենքի շրջանակներում, օգոստոս ամսին դիմել էր Վաքըֆների գլխավոր վարչություն` հայ կաթոլիկ գերեզմանատունը հետ վերցնելու նպատակով: Վաքըֆների գլխավոր վարչությունը դրական որոշում կայացնելով` դրա մասին հաղորդել է Սուրբ Հակոբ հիվանդանոցի վաքըֆին:
Սուրբ Հակոբ հիվանդանոցի վաքըֆի նախագահ Բերնարդ Սարըբայը, իր ուրախությունն արտահայտելով Մեջիդիյեքյոյի հայ կաթոլիկ գերեզմանատան վերադարձվելու կապակցությամբ, նշել է. «Մեջիդիյեքյոյում գտնվող այդ տարածքը հանձնվելու առաջին իսկ օրից գերեզմանոց է եղել: Այստեղ են ամփոփված անգամ օսմանյան սուլթանները»:
Akunq.net
Leave a Reply