Թուրքիայի միակ հայկական գյուղի գոյությունը վտանգի տակ է

Թուրքիայի խորհրդարանի կողմից վերջին օրերին ընդունված մեծ քաղաքների մասին սկանդալային օրինագծի` ուժի մեջ մտնելուց հետո Թուրքիայի միակ հայկական գյուղի իրավունքներն ի չիք են դառնալու։

Ստամբուլի հայկական «Ակօս»-ի փոխանցմամբ՝ իշխող Արդարություն եւ զարգացում կուսակցության (AKP) կողմից խորհրդարան ներկայացրած եւ անցկացրած մեծ քաղաքների մասին նոր օրինագծի հետ կապված Թուրքիայի միակ հայկական գյուղի՝ Վագըֆի (Վաքըֆլը) Սուրբ Աստվածածին եկեղեցու հիմնադրամի նախագահ Ջեմ Չափարը հայկական գյուղի բնակչության անհանգստությունն է փոխանցել Թուրքիայի արդարադատության նախարար Սադուլլահ Էրգինին։   

Ջեմ Չափարը նշել է, թե այս օրենքը ուժի մեջ մտնելուց հետո կփոխի Վագըֆը դեմոգրաֆիական պատկերը, որտեղ այժ ապրում են բացառապես հայեր։ Նրա խոսքով՝ նոր օրինագիծը ենթադրում է, որ Վագըֆը կորցնում է գյուղ լինելու կարգավիճակը։ «Մենք խնդրի մասին մեր անհանգստությունը հայտնել ենք Արդարադատության նախարարին եւ Հաթայի նահանգապետին։

Նախարարը, լինելով Հաթայից, կիսում է մեր անհանգստությունը՝ նշելով, որ Վաքըֆլըն Հաթայում խաղաղության եւ եղբայրության կարեւոր խորհրդանիշ է։ Նա մեզ խորհուրդ տվեց դիմում գրել եւ այդ օրենքի ուժի մեջ մտնելուց Վաքըֆլըի կարգավիճակը հաշվի առնել։ Մենք էլ դիմում ենք գրել»,-նշել է Վագըֆի Սուրբ Աստվածածին եկեղեցու հիմնադրամի նախագահը Ջեմ Չափարը։

Նշենք, որ Թուրքիայի խորհրդարանում մեծ սկանդալաներով եւ ծեծկռտուքով անցկացրած օրինագծով 500 հոգուց պակաս բնակչություն ունեցող գյուղերը կորցնում են գյուղ լինելու կարգավիճակը եւ կցվում են մեծ բնակավայրի՝ կորցնելով գյուղապետ ընտրելու իրավունքը։

Թուրքիայի Հաթայ նահանգում գտնվող միակ հայկական գյուղում ապրում են ընդամենը 135 հոգի։

http://news.am/arm/news/129143.html