Գերմանիայում Հայոց ցեղասպանության ճանաչումը կարելի է իրատեսական, սակայն, ցավոք, անհնարին համարել, գոնե մինչեւ 2015 թվականը: Այդ մասին նոյեմբերի 16-ին կայացած մամուլի ասուլիսում նշել է Բեռլինի Ազատ համալսարանի պրոֆեսոր, Գերմանիայում Հայոց ցեղասպանության ճանաչման հանձնաժողովի անդամ, բանասիրական գիտությունների դոկտոր Ժիրայր Քոչարյանը:
Ըստ նրա՝ արդյունավետության համար պետք է բարեկամանալ գերմանական մտավորականության ներկայացուցիչների հետ, կազմակերպել տարաբնույթ կոնֆերանսներ, սեմինարներ, քանի որ երկրի բնակչությունն այնքան էլ լավ տեղեկացված չէ Հայոց ցեղասպանության մասին:
«Շատ կարեւոր է, որ տեղեկատվական ոլորտում մենք չթերանանք: Ներկայում ադրբեջանցիներն ամբիոն ունեն Հումբոլդտի համալսարանում, եւ, հնարավոր է, եւս մեկը բացեն Բեռլինի համալսարանում, իսկ հայերն ամբիոն ունեն միայն Հալեի համալսարանում, որը Հայաստանի կողմից պետական ոչ մի ֆինանսական օգնություն չի ստանում», – նշել է Քոչարյանը:
Պրոֆեսորը հայտարարել է, որ ի տարբերություն Ֆրանսիայի եւ ԱՄՆ-ի, Գերմանիայում, ցավոք, ազդեցիկ հայ գործարարներ չկան, որոնք կկարողանային ֆինանսական աջակցություն ցուցաբերել:
Leave a Reply