Թուրքիայի խնդիրների պատճառը Հայոց ցեղասպանությունն է. թուրք իրավապաշտպան

Թուրքիայի Հանրապետության ներկայիս խնդիրների գլխավոր պատճառը Հայոց ցեղասպանությունն է և դրա ժխտումը, ասում է Ստամբուլում տեղակայված Մարդու իրավունքների ասոցիացիայի գործադիր մարմնի անդամ, թուրք իրավապաշտպան Այշե Գյունայսուն:
«Այո, դա (Հայոց ցեղասպանությունը – Tert.am) է հիմքը»,- Tert.am-ի հետ զրույցում ասում է նա` ավելացնելով, որ մերժողականությունը չի տեղավորվում մարդկային երևակայության մեջ և այն գործում է` ի վնաս Թուրքիայի:
«Ցեղասպանության հերքումը Թուրքիայի վրա անեծք է, դատապարտում: Թուրքիան խաղաղություն չի տեսել դրանից հետո, արյունահեղությունը չի դադարել, քրդական ընդվզումները հաջորդել են միմյանց, չկա իրական ժողովրդավարություն, իրար են հաջորդել ռազմական հեղաշրջումները»- ընդգծում է թուրք իրավապաշտանը, ով նաև
Armenian Weekly-ի հանդեսի և քրդական «Գյունդանիս» թերթի սյունակագիր է:
«Թուրքիան չգտավ խաղաղություն, չկա հարստություն, չկա մշակույթ: Երբեմնի Արևմտյան Հայաստանը հարուստ էր թատրոններով, քոլեջներով, կյանքը եռում էր: Այժմ դրանք ամուլ հողեր են»,- ասում է նա` նշելով, որ Թուրքիան ներկայում պատժվում է անցյալի սխալների համար:
«Դա դատապարտում է, անեծք է Թուրքիայի վրա»- ասում է Այշե Գյունայսուն և ընդգծում է, որ Հայոց ցեղասպանության արդյունքում Թուրքիան կորցրեց իր լավագույն մտածողներին:

Ըստ թուրք իրավապաշտպանի` Թուրքիան պետք է պարտվողի դերում հայտնվի, որպեսզի սովորի, թե ինչպես է հարկավոր վարվել մյուսների հետ:

«Հաղթանակը թունավոր բան է, իսկ պարտությունը` կրթող: Այս երկիրը (Թուրքիան – Tert.am) պետք է պարտություն կրի, որպեսզի կրթվի: Թուրքիան կորցրել է իր լավագույն ուղեղներին` հայերին, հույներին… Հասարակության լավագույն մասը ոչնչացվեց, որի պատճառով էլ կյանքի որակը վատացել է»- եզրափակում է Այշե Գյունայսուն:

http://tert.am/am/news/2012/11/18/aishe-gyunaysun/