Հայոց ցեղասպանությունը ճանաչած թուրք իրավապաշտպանը շնորհակալություն է հայտնել ասորիներին

Թուրք հայտնի իրավապաշտպան, «Բելգե» հրատարկչատան սեփականատեր Ռագըփ Զարաքոլուն շնորհակալություն է հայտնել ասորիներին՝ իրեն «Ասորական մշակութային պարգեւ» մրցանակը հանձնելու համար։

Ինչպես տեղեկացնում է քրդական Gelawej.net կայքը, Ռագըփ Զարաքոլուն ասորական միություններին շնորհակալական նամակ է գրել՝ շեշտելով, որ այն ժամանակ, երբ ինքը KCK-ի գործով գտնվում էր կալանքի տակ, իրեն շատ է ուրախացրել  «Ասորական մշակութային պարգեւ» մրցանակին արժանանալու մասին լուրը։

Ստոկհոլմի ասորական մշակութային կենտրոնի կողմից թուրք հայտնի իրավապաշտպան, «Բելգե» հրատարկչատան սեփականատեր Ռագըփ Զարաքոլուն արժանացել էր «Ասորական մշակութային պարգեւ» մրցանակին։

Մրցանակի հանձնման արարողությունը տեղի էր ունեցել 2012-ի մարտի 27-ին` Ստոկհոլմի Botykyrka ասորական մշակութային կենտրոնում։  Քանի որ Զարաքոլուն Թուրքիայում գտնվում էր կալանքի տակ, նրա մրցանակը եւ 5000 կրոն գումարը տրվել էին գրող Ֆեյազ Քերիմոյին՝ Զարաքոլուին փոխանցելու համար։

Ռագըփ Զարաքոլուն ձերբակալվել էր 2011-ի նոյեմբերին՝ KCK-ի (Քուրդիստանի հասարակությունների միություն-ենթադրաբար PKK-ի քաղաքացիական կառույց) գործով։ Մեղադրական զեկույցում Զարաքոլուի համար պահանջվում է 10 տարի ազատազրկում՝ «ահաբեկչական կառույցի անդամ լինելու» մեղադրանքով։

Հիշեցնենք, որ Ռագըփ Զարաքոլուն հայտնի իրավապաշտպան եւ հրատարակիչ է Թուրքիայում։ Նրա գլխավորած «Բելգե» հրատարկչատանը տպագրվել են Հայոց ցեղասպանության մասին բազմաթիվ գրքեր։ Զարաքոլուն 2011-ի փետրվարին այցելել էր Հայաստան։

http://news.am/arm/news/128564.html