Թուրքիայի խորհրդարանում փաստաթուղթ է հրապարկվել ալևիների ցեղասպանության մասին

Թուրքիայի խորհրդարանում փաստաթուղթ է հրապարկվել ալևիների ջարդի մասին: Թուրքիայի խորհրդարանի Հեղաշրջումների հետազոտման հանձնաժողովի նախագահ Նիմեթ Բաշը հրապարակել է նախկին նախագահ Քենան Էվրենի արխիվում գտնվող մի փաստաթուղթ, որում նախկին նահանգապետ եւ անվտանգության գլխավոր տնօրեն Ռեֆեթ Քյուչուքթիրյաքին խոստովանում է, որ ալևիների ամենամեծ ցեղասպանությունն ինքն է իրագործել: Այս մասին, ինչպես հաղորդում է «Արմենպրես»-ը` հայտնում է թուրքական «Ռադիկալ» թերթը:

Թերթը մեջբերում է 1980 թ-ի հոկտեմբերի 7-ի` Քյուչուքթիրյաքիի անձնական ստորագրությամբ խոստովանական նամակը` նշելով, որ այն ճգնաժամ է առաջացրել Թուրքիայում: Նամակում թուրք նախկին նահանգապետը գրում է. «Անվտանգության գլխավոր տնօրեն նշանակվելուց հետո Թուրքիայում առաջին անգամ պաշտոնապես ալևի-քըզըլբաշ ցեղասպանությունը պետության անունից ես եմ սկսել: 1976 թ-ի հունվարին Մալաթիայի Բեյլերդերեսիի իրադարձությունից Մալաթիայի կենտրոնում թափել եմ 40 ալևի քըզըլբաշների արյունը: Սուլթան Սելիմ Ահեղից հետո ալևի քըզըլբաշների ամենամեծ թշնամին ես եմ, դա ես ապացուցեցի եւ շարունակելու եմ ապացուցել: Ես Մալաթիայի ժանդարմերիայի հրամանատարությանը հրամայել եմ վերացնել Մալաթիայի ալևի քըզըլբաշներով բնակեցված գյուղերը: Իմ այս խոսքերը 1976 թ-ի մայիսին հրապարակվել է «Հալքըն Քուրթուլուշու» (Ժողովրդի ազատագրությունը) հանդեսում: Ներկայում ես անվտանգության գլխավոր տնօրենն եմ: 1976 թ-ին, երբ ես Մալաթիայի նահանգապետն էի, Մալաթիայի անվտանգության տնօրեն էի նշանակել Աբդուլքադիր Աքսուին, որն ինձ օգնեց այդ ցեղասպանությունն իրագործելու հարցում: Անկարայում ալևի քըզըլբաշներով բնակեցված «Քուրթարըլմըշ բյոլգե» (Ազատագրված շրջան) կոչված թաղամասերում արյուն թափած Ռեշաթ Աքքայային նույնպես Անկարայի անվտանգության տնօրեն դարձնողը ես եմ եղել: Ոչ մի ուժ չի կարող ինձ պաշտոնաթող անել` ոչ վարչապետը, ոչ նախագահը, ոչ էլ մեկ ուրիշը: 1981 թ-ի ընտրություններում Արդարություն կուսակցության` Մալաթիայի պատգամավորի թեկնածուն եմ: Ինձ զենքի ապօրինի վաճառքի մեջ մեղադրողներին ասում եմ, որ ես Բուլղարիայի վրայով բերված կոմունիստական զենքերով ալևիներին կոտորած մարդն եմ: Ռեֆեթ Քյուչուքթիրյաքի: Անվտանգության գլխավոր տնօրեն»:

Խորհրդարանում նամակի ընթերցմանը մասնակից Քյուչուքթիրյաքին հայտարարել է, թե ոչ մի տեղեկություն չունի այդ նամակի մասին, եւ որ այն իրենը չէ: «Ոչ մի ալևի-սունի պատմություն էլ գոյություն չունի», -հայտարարել է նա:

Աբդուլքադիր Աքսուն Թուրքիայի իշխող Արդարություն եւ զարգացում կուսակցության անդամ է եւ մինչեւ 2011 թ-ը գլխավորել է այդ երկրի ներքին գործերի նախարարությունը:

http://armenpress.am/arm/news/699297/turqiayi-khorhrdaranum-pastatuxt-e-hraparkvel-alavineri.html