Թուրքիայի փոխվարչապետ Բյուլենթ Առընչը հայտարարել է, որ պատրաստվում են Հայկական հարցի վերաբերյալ պատմական իրողությունները պատմող գեղարվեստական և վավերագրական ֆիլմեր նկարել, տեղեկացնում է «Հուրրիյեթ»-ը։
Պարբերականի կայքում հրապարակված լուրի տակ թուրք ընթերցողների մեկնաբանություններն ուշագրավ են։ Ֆիլմ նկարահանելուն կողմ, Հայոց ցեղասպանությունը ժխտող ընթերցողներից բացի, կան նաև մարդիկ, ովքեր կոչ են անում գոնե ֆիլմում ներկայացնել իրականությունը։
«Ցեղասպան Օսմանյան կայսրության մայրաքաղաքը Ստամբուլն է։ Խնդրում եմ այդ ֆիլմում պատմեք, որ ամենագեղեցիկ տեղերը դեռ մեր հայ քաղաքացիներին են պատկանում։ 600-ամյա կայսրության վերջին օրերը սարսափով էին լի»,-գրել է մի թուրք ընթերցող։
Մեկ այլ ընթերցող Առընչին խորհուրդ է տվել թողնել քաղաքականությունն ու մի կողմ քաշվել։
Մեկնաբանություններում նշվել է նաև, որ թուրքական կառավարությունն ինքը կստեղծի, ինքն էլ կդիտի ֆիլմը։
«Թող նկարեն, գոնե կհասկանանք, թե ո՞րն է թուրքական թեզը՝ ըստ էության։ Քարոզչություն մի՛ արեք։ Եթե «Թուրքական պատմության կազմակերպությանը» (կառավարությանը կից կառույց, որի նպատակը Ցեղասպանության ժխտումն է-Tert.am) բնորոշ մի ֆիլմ կթողարկվի, այդ դեպքում անգամ ագռավները կծիծաղեն մեզ վրա, իսկ դրա հասցրած վնասն ավելի մեծ կլինի»,-գրել է ընթերցողը։
Եվս մեկ ընթերցող գրել է. «Ձեր ֆիլմը միայն TRT-ով կհեռարձակվի, և դուք կրկին գլուխ կգովեք։ Մեծ ժողովների ընթացքում Պաղեստինից ու Սիրիայից խոսելու փոխարեն պատմե՛ք, թե մեր երկրում ինչեր են կատարվել»։
Leave a Reply