Թուրքիայում դժգոհության առիթ է տվել այն, որ Դիարբեքիրի քուրդ քաղաքապետ Օսման Բայդեմիրը բավական մեծ գումար է հատկացրել Սբ Կիրակոս հայկական եկեղեցու վերանորոգման համար, հաղորդում է Habervaktim-ը:
«Եկեղեցու վերանորոգման գործում մեր ներդրումը 90 տարվա ինքնաքննադատության և վերքերը միասնաբար դարմանելու ջանք է: Աստված թող օրհնի այն»,- պարզաբանել է Բայդեմիրը եկեղեցու վերանորոգման աշխատանքներին իր մասնակցությունը:
Թուրքիայում գործող իսլամամետ «Երջանկության» կուսակցության փոխնախագահ Լյութֆի Յալմանը քննադատել է Բայդեմիրին` նշելով այն փաստը, որ մուսուլմանների տված հարկերից եկեղեցի է կառուցվում: Քննադատելով քուրդ քաղաքապետին` իսլամամետ կուսակցության փոխնախագահն ասել է, թե Բայդեմիրն աստվածահաճո գործ չի կատարել:
Յալմանի խոսքով` եկեղեցու վերանորոգման աշխատանքներին օժանդակությունը ոտնահարում է մուսուլմանների իրավունքները` հավելելով, որ եկեղեցիների վերանորգման պարտականությունը պատկանում է Թուրքիայի մշակույթի նախարարությանը:
«Երջանկության» կուսակցության փոխնախագահը նաև Կ.Պոլսի Հայոց պատրիարքարանին և Թուրքիայի հայ համայնքին է կոչ արել Դիարբեքիրի քաղաքապետարանին վերադարձնել մուսուլմանների հարկերից հավաքված գումարը:
2010թ. Դիարբեքիրի «Սբ Կիրակոս եկեղեցի» հիմնադրամի նախաձեռնությամբ սկսվել են եկեղեցու վերանորոգման աշխատանքները, որոնց օժանդակում էր Կ. Պոլսի հայոց պատրիարքարանը: Եկեղեցու վերանորոգման աշխատանքներին իր մասնակցությունն էր բերել Դիրաբեքիրի քաղաքապետարանը` հատկացնելով 1 մլն թուրքական լիրա: Երկուսուկես տարի տևած վերանորոգման աշխատանքներն ավարտվել են անցած տարվա հոկտեմբերին, երբ վերաբացվել է եկեղեցին: 2012թ. նոյեմբերի 4-ին զանգակատան վերանորոգումից հետո Դիարբեքիրի Սբ Կիրակոս հայկական եկեղեցում 98 տարի ընդմիջումից հետո պատարագ է մատուցվել:
Leave a Reply