Էրդողանը չի մասնակցել Աթաթուրքի մահվան տարելիցի միջոցառումներին

Թուրքիայի Հանրապետության հիմնադիր Մուսթաֆա Քեմալ Աթաթուրքի մահվան տարելիցին չի մասնակցել Թուրքիայի վարչապետ, իսլամիստական հայացքներով հայտնի Ռեջեփ Թայիփ Էրդողանը։

Ստամբուլի ամենաշքեղ պալատը՝ Դոլմաբահչեն, որը կառուցել է հայտնի հայ ճարտարապետ Կարապետ Պալյանը, նոյեմբերի 10-ի առավոտյան բացվել էր Աթաթուրքի հիշատակը հարգողների առաջ։ Պաշտոնական արարողակարգի մասնակիցները ուղիղ 09։05-ին կագնել են Դոլմաբահչե պալատի այն սենյակում, որտեղ 1938 թվականի նոյեմբերի 10-ին, 09։05-ին մահացել էր Աթաթուրքը։

Պաշտոնական մյուս գլխավոր միջոցառումը տեղի է ունեցել Անկարայում՝ Աթաթուրքի դամբարանի մոտ, որտեղ Թուրքիայի նախագահ Աբդուլլահ Գյուլը ծաղկեպսակ է դրել՝ գրառում անելով դամբարանի հուշատետրի մեջ. «Թուրքիան ձեր իդեալներով եւ մտքերով ուժ է առնում եւ շարունակում վերելքը»։

Մամուլում առանձանահատուկ ուշադրություն են դարձնում այն հանգամանքին, որ օսմանյան կարգերը թաղած եւ Թուրքիայում աշխարհիկության հիմքերի հիմնադրի մահվան 74-րդ տարելիցին արտասահմանյան շրջագայության պատճառով չի մասնակցել Թուրքիայի վարչապետ Ռեջեփ Թայիփ Էրդողանը։

Թուրքական Hakimiyetmilliye.org կայքը հարցում էր տեղադրել իր կայքում՝ ընթերցողներին հարցնելով, թե որտե՞ղ կլինի Էրդողանը նոյեմբերի 10-ին եւ տեղադրել պատասխաների մի քանի տարբերակ։

Հարցվածների 50 տոկոսը հավատացել է, թե Էրդողանը նոյեմբերի 10-ին մասնակցելու Աթաթուրքի մահվան տարելիցի միջոցառումներին Աթաթուրքի դամբարանի մոտ։ 35 տոկոսը պատասխանել է, թե նա այդ օրը քյաբաբ է պատրաստելու Բրունեյի սուլթանի ոսկե պալատում, 10 տոկոսը մտածել է, թե Էրդողանն այդ օրը Մոգադիշոյում ժամանակակից ժողովրդավարության դասեր է տալու, իսկ 2,5 տոկոսը կարծել է, թե Էրդողանը նոյեմբերի 10-ին Դամասկոսում կմասնակցի Ասադի դեմ կազմակերպված բողոքի ցույցին։

http://news.am/arm/news/128067.html