Hindustan Times-ն անդրադարձ է ներկայացրել ռեժիսոր Շեքհար Կապուրի՝ Հայոց ցեղասպանության թեմայով ֆիլմ նկարահանելու մտահղացման վերաբերյալ: Կապուրը HT-ին ասել է, որ գիտի, թե որքան բարդ է դա լինելու. «Դրա համար շատ գումար, նվիրվածություն և կազմակերպչական աշխատանք կպահանջվի», – նշել է ռեժիսորը:
Պարզվում է՝ այս գաղափարով հնդիկ ռեժիսորը տարվել է այն բանից հետո, երբ նրան համապատասխան առաջարկ է ուղարկել հանրահայտ «Մոտոցիկլետիստի օրագրերը» ֆիլմի սցենարիստը: Այդ ֆիլմը պատմում է լեգենդար Չե Գևարայի մասին:
Կապուրն ասել է, որ Հայոց ցեղասպանությունը «աշխարհի պատմության էջերից է՝ թեև ամոթալի»: Ռեժիսորը խոսել է նաև այն մասին, որ Հայոց ցեղասպանությունը տաբու է Թուրքիայում: «Այն շրջանից ոչ ոք կենդանի չէ այսօր, իսկ նոր սերունդը հավատում է, որ իր ազգը հզոր է և պետք է առաջ գնալ»:
Ավելի վաղ Կապուրը իր այդ գաղափարի մասին բարձրաձայնել էր սոցկայքերում, ապա նույն մտքին հետամուտ այցելել Հայաստան։ Այդ ժամանակ նրա մտահղացման մասին խոսել էին նաև հայկական մամուլում: Այժմ արդեն հնդիկ ռեժիսորը իր գաղափարին հաղորդակից է դարձրել նաև հնդկական մամուլին ու հանրությանը:
Սակայն Կապուրը հայտնել է, որ այդ ֆիլմի վրա աշխատանքը կսկսի մեկ տարուց ոչ շուտ, քանի որ նախ պետք է ավարտին հասցնի իր հին ֆիլմը:
http://tert.am/am/news/2012/11/08/kapur-ht/
Leave a Reply