Թուրքական Zaman թերթի փոխանցմամբ՝ Մեծ միասնություն կուսակցության (ՄՄԿ) նախագահ Մուսթաֆա Դեսթիջին մահապատժի վերականգնման շուրջ հարցախույզ է անցկացրել երկրի 81 նահանգներից 29-ում: Ամփոփելով հարցախույզի արդյունքները՝ Դեսթիջին հայտարարել է, որ հարցվածների 98 տոկոսը ցանկանում է մահապատժի վերականգնում:
Դեսթիջին դա պայմանավորել է նրանով, որ բնակչությունը ցանկանում է մահապատժի ենթարկել լեռները բարձրացած PKK-ականներին: Թուրք կուսակցապետն ուշադրություն է հրավիրել այն հանգամանքի վրա, որ ներկայում բնակչության շրջանում էլ ավելի է արմատավորվել մահապատժի վերականգնումը՝ կապված քուրդ առաջնորդ Աբդուլլահ Օջալանին ազատ արձակելու և մայրենի լեզվով դատարանում պաշտպանվելու իրավունք ստանալու համար թուրքական բանտերում հարյուրավոր քրդերի կազմակերպած հացադուլի հետ:
Դեսթիջին ընդգծել է, որ կառավարությունը պետք է հանրաքվե անցկացնի մահապատժի վերականգնման համար, ինչի հաջողման դեպքում առաջին հերթին մահապատժի կենթարկվեն ահաբեկիչները (նկատի են առնվում PKK-ականները) և երեխաներին բռնաբարողները:
Հիշեցնենք, որ Թուրքիայի վարչապետ Ռեջեփ Էրդողանը նույնպես մահապատժի վերականգնման ցանկություն է հայտնել՝ ափսոսանք հայտնելով, որ 1999 թ. որոշ ուժերի ճնշման ներքո չհաջողվեց մահապատժի ենթարկել PKK-ի հիմնադիր Աբդուլլահ Օջալանին:
http://www.1in.am/arm/regional_turkey_130141.html
Leave a Reply