Թուրքիայում լույս է տեսել Ցեղասպանությունից մազապուրծ եղած ընտանիքում ծնված Սարգիս Չերքեզյանի գիրքը

Ստամբուլի «Բելգե» հրատարակչությունը հրատարակել է Սարգիս Չերքեզյանի «Աշխարհը կհերիքի բոլորիս» գիրքը: Չերքեզյանը ծնվել է 1916 թ. մայիսի 15-ին` Հայոց ցեղասպանությունից մազապուրծ եղած ընտանիքում. Սարգիսը ծնվել էր սիրիական անապատում, ուղտի ախոռում: Ինչպես հաղորդում է «Արմենպրես»-ը` վկայակոչելով CNNTurk-ը, գրքում բերված պատմությունն անդրադառնում է 20-րդ դարի սկզբում Թուրքիայում տեղի ունեցած իրադարձություններին:

Թուրքական հեռուստաալիքը մեջբերել է «Բելգե» հրատարակչությունում կազմակերպված հանդիպման ժամանակ ընթերցողների արտահայտած հետեւյալ մտքերը. «Սարգիս Չերքեզյանը հայ ազգի եւ ընտանիքի կրած ցավերը խորապես զգացած, մանկական միամտությունը չկորցրած հարգված կոմունիստ էր: Նա ամբողջ կյանքում աշխատել է Թուրքիայի կոմունիստական շարժման կարեւոր մասը հանդիսացող Կոմունիստական կուսակցության կարեւոր օղակներում»:

«Սարգիս Չերքեզյանն ուղղամտությանը սկզբունքորեն նվիրված կյանք է ապրել… գաղթի տարիներ, Սիրիայի անապատներ, վերադարձ Քարաման, Էրելի եւ Ստամբուլ…»:

«Ուստա Սարգիսն ատաղձագործ էր, կյանքի վարպետ, ուսուցիչ, գիտակ…Գրքում նրա բացատրածը հանուն հասարակական հավասարության եւ եղբայրության համար ներդաշնակ, անընդհատ պայքարի պատմություն է…»:

«Նա, միեւնույն ժամանակ, բացատրում է նաեւ ապրողների պատմությունը, նրա պատմածում պատմությունը չի կանգնում` շարունակվում է…»:

http://armenpress.am/arm/news/698713/turqiayum-luys-e-tesel-cexaspanutyunic-mazapurts.html