ԱՄՆ պետքարտուղարությունը տեղյակ չէ, որ Բաքուն ԱՄՆ դեսպանին արգելել է այցելել Ջուղայի գերեզմանատուն

ԱՄՆ պետքարտուղարության պաշտոնական ներկայացուցիչ Վիկտորիա Նուլանդը երեկ լրագրողների հետ կայացած ճեպազրույցի ընթացքում նշել է, որ ԱՄՆ պետքարտուղարությունը տեղեկություններ չունի, որ Բաքուն Ադրբեջանում ԱՄՆ դեսպանին արգելել է այցելել Ջուղայի հայկական գերեզմանատուն:

Այս մասին նշված է ԱՄՆ պետքարտուղարության պաշտոնական էջում:

Լրագրողը նշել է, որ Ադրբեջանի կառավարությունը դեսպան Ռիչարդ Մորնինգսթարին արգելել է այցելել հին հայկական գերեզմանատուն, որը մի շարք վկայությունների համաձայն` պղծվել է ադրբեջանցի զինվորների կողմից:

Լրագրողի հարցին, թե ինչպես է Բաքուն մեկնաբանել իր կողմից սահմանված այս արգելքը, Վիկտորիա Նուլանդը զարմացած պատասխանել է. «Ես պատրաստվում եմ ձեզ ուղարկել Բաքվում մեր դեսպանատուն: Անկեղծ ասած, ես ընդհանրապես տեղեկություններ չունեմ այդ ամենի մասին»:

Ինչպես երեկ հայտնել էինք, Ամերիկայի հայ ազգային կոմիտեն Բաքվում ԱՄՆ դեսպան Ռիչարդ Մորնինգսթարին կոչ է արել հավատարիմ մնալ իր խոստմանը և այցելել Նախիջևանում գտնվող Ջուղայի հայկական գերեզմանատուն: Նշենք, որ ԱՄՆ դեսպան Ռիչարդ Մորնինգսթարն ավելի վաղ նշել էր, որ ինքն այցելել է Նախիջևան, սակայն իրեն արգելել են այցելել հայկական գերեզմանատուն:

http://haynews.am/hy/1352272807