Թուրքիայի հարավարեւելյան հատվածում գտնվող Դիարբեքիրի Սուրբ Կիրակոս եկեղեցու վերաբացման կապակցությամբ հայտարարություն է արել Դիարբեքիրի քուրդ քաղաքապետ Օսման Բայդեմիրը։ (ֆոտոռեպորտաժ)
Մերձավոր Արեւելքի ամենամեծ հայկական եկեղեցու վերոնորգման ծախսերի 30 տոկոսն ստանձնած Դիարբեքիրի քաղաքապետ Օսման Բայդեմիրը հայտարարել է, թե Սուրբ Կիրակոսի բացումը անցյալի վերքերը միասին բուժելու ջանք է, իսկ մեր աջակցությունը՝ 90 տարիների հատուցումը…։
Դիարբեքիրում նոյեմբերի 4-ին տեղի ունեցավ հայկական Սուրբ Կիրակոս եկեղեցու ամբողջական վանական համալիրի օծումն ու առաջին պատարագը։ Պատարագին մասնակցել են Սուրի քաղաքապետ Աբդուլլահ Դեմիրբաշը, Դիարբեքիրի փոխքաղաքապետ Հաֆիզե Իփեքը, դիարբեքիրցի հայտնի հայ գրող, ում անունով Դիարբեքիրում կա նաեւ փողոց, Մկրտիչ Մարկոսյանը, Հրանտ Դինքի կինը՝ Ռաքել Դինքը, բազմաթիվ արվեստագետներ, լրագրողներ եւ աշխարհի տարբեր մասերից Դիարբեքիր ժամանած հայեր։
Նշենք, որ 1400 աղոթատեղի ունեցող Դիարբեքիրի Սուրբ Կիրակոս եկեղեցին կառուցվել է 1376 թ., Հանչեփեք թաղամասում, որը տեղի մահմեդականները անվանել են «գյավուրների թաղամաս» քանի որ մեծ թվով քրիստոնյաներ են ապրել մինչեւ Հայոց ցեղասպանությունը:
Մերձավոր արեւելքի ամենամեծ եկեղեցու զանգակատունը 1913 թ. ավերվել է կայծակի հարվածից, որից հետո տեղի հայերը նոր զանգակատուն են կառուցել, որի զանգը ձուլվել էր ոսկու եւ պղնձի խառնուրդից: Սակայն 1914 թ. այս անգամ կայծակի հարվածած տեղին հարվածեցին թուրքերը՝ թնդանոթով ավերելով զանգակատունը միայն նրա համար, որ այն ավելի բարձր էր շրջակայքի մզկիթների մինարեթներից:
Սուրբ Կիրակոս եկեղեցին 1980 թ. թողնվել է բախտի քմահաճույքին։ Այնուհետ, Ստամբուլում ապրող դիարբեքիրցի հայերը ստեղծել են «Սուրբ Կիրակոս հիմնադրամ»՝ վերանորոգելու եկեղեցին։ 2,5 մլն դոլար արժողությամբ վերանորոգման ծախսերի 70 տոկոսը իր վրա է վերցրել հայկական հիմնադրամը, իսկ 30-ը՝ Դիարբեքիրի քաղաքապետարանը։
Leave a Reply