«Իմ պաշտպանյալը չի արատավորել թուրք զինվորի պատվաբեր համազգեստը»

ՀԱԿՈԲ ՉԱՔՐՅԱՆ

Դատապաշտպանը նկատի ունի Սեւակ Շահինի մարդասպանին:

2011 թ. ապրիլի 24-ին, երբ Դիարբեքիրի վիլայեթին հարող Բաթմանի զորամասերից մեկում այսպես կոչված պատահական կրակոցով սպանվեց ժամկետային զինծառայող Սեւակ Շահինը, գրել էինք, որ սպանությունը Հայոց ցեղասպանության թուրքական ժխտողականության չարանենգ արձագանքն է:

Թուրքահայ Սեւակի` Մեծ եղեռնը խորհրդանշող օրն իրականացված սպանությամբ թուրք հրոսակը փորձում էր ազդանշան տալ Հայոց ցեղասպանությունը ճանաչելու պատրաստակամություն դրսեւորող երկրներին, թե Թուրքիայի հայերը պատանդ են ինչպես թուրքական պետության, այնպես էլ արյունարբու թուրք զանգվածների համար, որոնք նույնիսկ 21-րդ դարում փոխանակ ձգտելու, որ գոնե մի քիչ մարդու կերպարանք ստանան, ստոր մարդասպանով են հիանում:

Այդ երկրներին շանտաժի ենթարկելիս հրոսակը միաժամանակ սաստում էր երկրում Հայոց ցեղասպանության մասին հրապարակավ արտահայտվող հատուկենտ մտավորականներին, նրանց հետ թուրքահայերին, ինչու չէ` նաեւ Հայաստանին:

Այդ փորձով թուրք հրոսակն ընդամենը ցույց տվեց իր մարդասպան դեմքը: Խնդիրը, սակայն արյունարբու հրոսակի դեմքը չէ, հայ ժողովուրդը քաջածանոթ է այդ դեմքին, այլ Սեւակ Շահինի սպանության վերաբերյալ մեր կարծիքի ակամա հաստատումը դատական 9-րդ նիստում, որը, ինչպես նշել էինք նախորդ համարում, տեղի էր ունեցել երկուշաբթի օրը:

Սեւակ Շահինի սպանության գործով ռազմական ատյանի դատական այս նիստին երեկ Դիարբեքիրից անդրադարձել է «Էվրենսել» թերթը` վկայակոչելով քրդական «Դիջլե» լրատվական գործակալությանը, որի հրապարակումն արտատպել է Կ. Պոլսո հայոց պատրիարքարանի ոչ պաշտոնական խոսափող «Հայթերթ» կայքէջը:

Նիստը, ըստ «Էվրենսելի», տեղի է ունեցել Դիարբեքիրի մարտավարական ռազմաօդային երկրորդ ուժերի հրամանատարությանն առընթեր ռազմական ատյանում: Ներկա են գտնվել մարդասպան Քըվանչ Աղաօղլուն, Սեւակ Շահինի ընտանիքն ու նրանց դատապաշտպանները:

Մարդասպանի դատապաշտպան Իբրահիմ Գյոքը տուժող կողմին մեղադրել է դատական գործընթացն իրավական հարթությունից քաղաքական հարթություն փոխադրելու եւ քաղաքական կուսակցություններին դատական գործում ներգրավելու մեջ:

Այնուհետեւ դատապաշտպանն ասել է. «Այս գործը որեւէ առնչություն չունի կուսակցությունների հետ: Դա դուրս մի բերեք իրավագիտական ոլորտից: Իմ կարծիքով, հայկական որեւէ հարց գոյություն չունի Թուրքիայում: Ճիշտ չէ, սպանության միջադեպի պայմանավորումը 1915 թ. իրադարձություններով: Թուրքիայում Հայկական հարց չի եղել: Իմ պաշտպանյալը չի արատավորել թուրք զինվորի պատվաբեր համազգեստը: Կարծում եմ, այստեղ դատավարությունը քաղաքականացնելու փորձ է արվում»:

Դատավարությունը հետաձգվել է: Նիստում դատական կոլեգիան մեղավոր է ճանաչել Սեւակ Շահինի սպանության ականատես, նույն զորամասում ծառայող շարքային Հալիլ Էքշիին` նախնական ցուցմունքը 6 անգամ փոխելու համար, ինչպես նաեւ մարդասպան Քըվանչի մորեղբորը:

«Էվրենսելը» այլ մանրամասներ չի հաղորդում: Սակայն թուրքական թերթի հրապարակումը, անկախ մանրամասնություններից, որքան էլ ակամա լինի, երեւան է հանում թուրքահայ զինծառայող Սեւակ Շահինի Մեծ եղեռնը խորհրդանշող ապրիլի 24-ին սպանության եւ 1915 թ. ցեղասպանության անմիջական առնչությունը:

Ինչ վերաբերում է արյունարբու թուրք հրոսակի մարդասպան դեմքին, ապա դա էլ բացահայտում է մարդասպանի դատապաշտպան Գյոքի խոսքերը, թե իր պաշտպանյալը չի արատավորել թուրք զինվորի պատվաբեր համազգեստը: Դատապաշտպանները մտավորական են, թե ոչ, չգիտենք, բայց որ Սեւակ Շահինին սպանող Աղաօղլուի դատապաշտպան Գյոքը թուրք է, իսկ թուրքը նույնիսկ 21-րդ դարում հայ սպանելու մոլուցքով տառապող եւ մարդասպանին փառաբանող մարդկային տականք, ակնհայտ է: Կամ դատապաշտպան կոչված այդ արարածը զինվորին չի տարբերում մարդասպանից, կամ էլ, նրա համոզմամբ, զինվորը պետք է մարդասպան լինի, ինչպես նրա պաշտպանյալ Քըվանչ կոչված վարձկան հրոսակը:

http://azg.am/AM/2012110703