Ամերիկայի հայ ազգային կոմիտեն Բաքվում ԱՄՆ դեսպան Ռիչարդ Մորնինգստարին կոչ է արել հավատարիմ մնալ իր խոստմանը և այցելել Նախիջևանում գտնվող Ջուղայի հայկական գերեզմանատուն:
ANCA-ն մեջբերում է դեսպանի խոսքերը, ով վերջերս այցելել էր Նախիջևան, սակայն չէր կարողացել այցելել հայկական գերեզմանատուն:
Նշվում է, որ Բաքվում ԱՄՆ դեսպանը հայտարարել էր, որ «Նախիջևանում հանդիպել է մի շարք պաշտոնատար անձանց հետ և նրանց հետ քննարկել հայկական գերեզմանատան ավերման վերաբերյալ հարցեր»:
«Ցավում եմ, որ պաշտոնատար անձիք, անվտանգության նկատառումներից ելնելով, ինձ թույլ չտվեցին այցելել հայկական գերեզմանատուն»,-նշել էր Բաքվում ԱՄՆ դեսպանը:
«Նա կարող է շարունակել թակել Իլհամ Ալիևի դուռը մինչև որ այս անհիմն արգելքը վերացվի, կամ կարող է պարզապես գնալ Ջուղա իր նախաձեռնությամբ: Երկու դեպքոււմ էլ, պարզ է, որ որպես ամերիկացիներ, մենք չպետք է զինամթերք վաճառենք Ադրբեջանին, որը այն օգտագործում է գերեզմանատներն ավիրելու համար, ոչ էլ օգնություն տրամադրել կառավարությանը, որն արգելում է ԱՄՆ դեսպանին այցելել մշակութային արժեք ներկայացնող վայր»,- նշել է ANCA-ի տնօրեն Արամ Համբարյանը:
Հիշեցնենք, որ Ռիչարդ Մոնինգստարը իր դեսպան նշանակվելուց առաջ ԱՄՆ Սենատում հայամետ սենատորների հարցերին պատասխանելու ժամանակ խոստացել էր, որ դեսպան դառնալու դեպքում ջանք չի խնայի Ջուղայի հայկական գերեզմանատուն այցելելու համար:
http://haynews.am/hy/1352182588
Leave a Reply