Ստամբուլահայ երիտասարդ ուսուցչուհիները կմասնակցեն հայ գրականության օրերին

Ստամբուլի հայկական դպրոցներում ուսուցիչների պակասը լրացնելու նպատակով «Վաքըֆների փոխօգնության և կապի հիմնադրամ»-ի տրամադրած կրթաթոշակով Ստամբուլի Այդըն համալսարանի մանկավարժության բաժնում մի քանի հայ ուսանող է սովորում: Ապագա ուսուցիչները այս տարի ավարտական կուրսում են գտնվում: Նրանք դեկտեմբերի 15, 18 և 20-ին ելույթ են ունենալու Գում Գափուի Որդվոց Որոտման եկեղեցու Մեսրոպ Մութաֆյանի անվան մշակույթի կենտրոնում կազմակերպված հայ գրականության օրերի շրջանակներում: Այս մասին հոդված է տպագրել ստամբուլյան «Ակօս» շաբաթաթերթը:
Նախաձեռնության մասնակիցներն են երիտասարդ հայ ուսուցչուհիները`Նադիա Չընարը, ով փորձաշրջան է անցնում Սահակյան վարժարանում, Թոփքափըի Լևոն Վարդուհյան դպրոցում փորձաշրջան անցնող Իզաբել Մարտիրոսյանը և Լեդա Սիմոնը, ով ուսուցչության փորձ է ձեռք բերում Յեշիլքյոյի դպրոցում: Նրանք ընթերցելու են նշանավոր հայ բանաստեղծների ստեղծագործությունները: Երեկոյի ընթացքում, որը կազմակերպել է Արամ Կոստանյանը, նախատեսվում է նաև հայկական երգի ու պարի ցուցադրություն:
Երիտասարդ հայ ուսուցիչները, որոնց դասավանդում է Տատյան վարժարանի հայոց լեզվի ուսուցիչ Բայզար Յուջեյանը, համալսարանական կրթության հետ մեկտեղ մասնակցում են նաև հայոց լեզվի դասընթացների, որոնք կազմակերպել է «Ուսուցիչների հիմնադրամ»-ը, իսկ դասավանդում են Սևան Դեյիրմենջյանն ու Կարապետ Տակեսյանը:
Երիտասարդ աղջիկները, որոնք Հայաստան են այցելել ՀՀ Սփյուռքի նախարարության կազմակերպած «Արի տուն» ծրագրի շրջանակներում, անհամբեր սպասում են, թե երբ են սկսելու դասավանդել հայ երեխաներին: Պետք է նշել, որ Ստամբուլի հայկական դպրոցներում նոր կադրերի պակաս կա և շատ կարևոր ու ողջունելի է, որ պոլսահայ երիտասարդները որոշում են մանկավարժ դառնալ` այդպիսով օգնելով իրենց հայրենակիցներին` պահպանելու հայոց լեզուն, հայկական մշակույթն ու կրոնը թուրքական միջավայրում, որտեղ մեծ է ձուլվելու վտանգը:

http://ankakh.com/2012/11/255377/