Կ.Պոլսի հայոց պատրիարքարանը Թուրքիայի կառավարությունից պահանջել է վերադարձնել հայկական եկեղեցիները

Կոստանդնուպոլսի հայոց պատրիարքարանը բազմաթիվ դիմումներ է ուղարկել Թուրքիայի կառավարությանը` համայնքին չպատկանող հայկական եկեղեցիների վերադարձի պահանջով: Այս մասին «Արմենպրես»-ին հաղորդեցին Հայոց պատրիարքարանից` հավելելով, որ գործող հայկական եկեղեցիները, որոնք գտնվում են Թուրքիայի տարածքում, պատկանում են Կ.Պոլսի պատրիարքարանին և հայկական համայնքին: 

«Թուրքիան, սակայն, համարձակություն չունի կատարելու պատրիարքության պահանջը, քանզի չի կարողանում օժանդակել նույնիսկ համայնքապատկան գործող եկեղեցիներին: Պետք է շեշտել այն հանգամանքը, որ Թուրքիայի հայ համայնքը զոհողություններ է հանձն առնում համայնքապատկան եկեղեցիների նորոգման և բարեկարգման համար: Ցայտուն օրինակ է Տիգրանակերտի Սբ Կիրակոս եկեղեցին, որը համայնքապատկան է և հիմնովին նորոգվեց, որի համար, սակայն, հնարավոր չեղավ բավարար օժանդակություն ապահովել, և այժմ եկեղեցու Ծխական խորհուրդը պարտքի մեջ է»,- հայտնեցին Կ.Պոլսի Հայոց պատրիարքարանից:

Թուրքիայի հարավ-արեւելյան հատվածում գտնվող Դիարբեքիր քաղաքում նոյեմբերի 4-ին տեղի ունեցավ հայկական Սուրբ Կիրակոս եկեղեցու ամբողջական վանական համալիրի օծումն ու նոր պատարագը։ Սուրբ Կիրակոս եկեղեցին 1980-ից թողնվել է բախտի քմահաճույքին, սակայն Ստամբուլում ապրող դիարբեքիրցի հայերը ստեղծել են «Սուրբ Կիրակոս» հիմնադրամ՝ եկեղեցին վերանորոգելու համար։ 2,5 մլն դոլար արժողությամբ վերանորոգման ծախսերի 70 տոկոսը իր վրա է վերցրել հայկական հիմնադրամը, իսկ 30-ը՝ Դիարբեքիրի քաղաքապետարանը։

http://armenpress.am/arm/news/698488/kpolsi-hayoc-patriarqarany-turqiayi-karavarutyunic.html