Լուվրը հակադարձել է Թուրքիային. ստեղծագործությունները գողացված չեն, եւ վերադարձի մասին խոսք չի կարող լինել

Փարիզի Լուվր թանգարանի տնօրինությունը հայտարարություն է տարածել թուրքական կողմի այն պահանջի հետ կապված, թե Լուվրի Իսլամական արվեստի բաժնում ներկայացված կերամիկական զարդանախշերը գողացված են, եւ դրանք պետք է վերադարձնել Թուրքիային։

Թուրքական Turkishnews.com կայքի փոխանցմամբ՝ Լուվրի տնօրինության տարածած հայտարարության մեջ նշվել է, թե թուրքական կողմի ներկայացրած կերամիկական նախշերը 19-րդ դարի վերջին Ֆրանսիա են հասել օրինական ճանապարհներով, իսկ թանգարանը դրանք գնել է կամ նվիրատվություն ստացել։ Նշվել է, թե գողացված կերամիկան ժամանակին գնվել է ֆրանսիական արվեստի պատմության մասնագետ Գերման Բապտիստի կողմից 1889-ին, եւ դրա հետ Լուվրը ոչ մի առնչություն չունի։

Հայտարարության մեջ նշվել է, թե թուրքական կողմից իրենց պաշտոնական պահանջ չի ներկայացվել` արվեստի նմուշների վերադարձի հետ կապված։ «Բացի այդ, ՅՈՒՆԵՍԿՕ-ի կողմից 1970 թ. նոյեմբերի 14-ին մշակութային արժեքների պահպանության հետ կապված կոնվենցիան եւ ֆրանսիական օրենքները հստակ են, ուստի արվեստի գործերի հետ վերադարձի մասին խոսք չի կարող լինել»,-նշվել է Լուվրի թանգարանի տնօրինության հայտարարության մեջ։

Նշենք, որ Լուվրում 2012 թ. սեպտեմբերի 22-ից բացված իսլամական արվեստի բաժնում ներկայացված են սուլթան Սելիմ 2-րդի փեսաներից Դերյա Փիյալե փաշայի կողմից 1573 թ. Ստամբուլում կառուցված մզկիթի ներսում գտնվող կերամիկական նախշերը։

http://news.am/arm/news/127342.html