«36-ի հռչակագրի» զոհը դարձած Բոմոնթիի Մխիթարյան վաքըֆը շահել է այն դատական գործը, որը հարուցել էր` դպրոցական շենքը վաքըֆին վերադարձնելու համար: Այդ անարդարությանը վերջ է տրվել Վաքըֆների գլխավոր տնօրինության և Այաշի քաղաքապետարանի դեմ Ստամբուլի 13-րդ հիմնարար իրավունքների դատարանում հարուցված դատական գործի դրական հանգուցալուծման շնորհիվ:
Այդ մասին հայտնում է Akunq.net-ը` վկայակոչելով պոլսահայ «Ակօս» շաբաթաթերթը: Աղբյուրի հաղորդմամբ` Սուրբ Ղազար կղզու հայ կաթոլիկ մխիթարյանների վանքի և դպրոցի վաքըֆը, Քադըքյոյի (նախկինում` Քաղկեդոն, ներկայում` թաղամաս Ստամբուլի ասիական ափին) սահմաններում գտնվող մի գույք վաճառելով, այն ժամանակաշրջանի օրենքների շրջանակներում Էմինե Թեվֆիքա Այաշլըից գնել էր Ստամբուլի Շիշլի թաղամասի Արփասույու փողոցում գտնվող մի շենք: Վաքըֆը խնդիրների էր հանդիպել 1958 թ. սկսած, երբ գնել էր սույն շինությունը, սակայն չնայած այդ բոլոր բասական երևույթներին` 1964 թ-ից սկսել էր շենքն օգտագործել որպես Բոմոնթիի Մխիթարյան նախակրթարան:
Այաշլըն, ով բազմաթիվ այլ անշարժ գույքերի տեր էր, որոնք նրա մահից հետո, որպես նվիրատվություն, հանձնվեցին Անկարայի Այաշի քաղաքապետարանին, վախճանվել է ր հենց նույն տարում, երբ իրականացվել էր հիշյալ շենքի վաճառքի գործարքը:
Չնայած որ այս կառույցի վաճառքի գործարքը կատարվել էր 1958 թ., սակայն Այաշի քաղաքապետարանը սկսել էր պնդել, թե դպրոցի շենքը Էմինե Թեվֆիքա Այաշլըին պատկանած գույքերից մեկն է, և այդ տարեթվից սկսած անհանգստացրել էր վաքըֆին ու պահանջել շենքը դատարկել:
Կառույցը, «36-ի հռչակագրի» վրա հիմնվելով կայացված դատական որոշմամբ, 1985 թ. փոխանցվել էր Այաշի քաղաքապետարանին:
Վաքըֆի ղեկավարությունը, որն ստիպված էր վարձ վճարել այն շենքի համար, որը գնել էր ինքը, դիմել էրդատարան` անցյալ տարի ուժի մեջ մտած այն օրենքի դրույթում տեղ գտած որոշման շրջանակներում, որը նախատեսում է հասարակական հաստատությունների անվամբ գրանցված գույքերի վերադարձը` համայնքային վաքըֆներին:
Ստամբուլի 13-րդ հիմնարար իրավունքների դատարանում քննված սույն դատական գործի վճիռը կայացվել է նոյեմբերի 1-ին, ըստ որի` որոշվել է դպրոցական շենքը վերադարձնել վաքըֆին:
Բոմոնթիի Մխիթարյան վաքըֆի ղեկավար Ռիտա Նուրնուրը, ով իր մեծ գոհունակությունն է արտահայտել այն փաստի կապակցությամբ, որ որպես վաքըֆ` տարիներ շարունակ իրենց մղած պայքարը դրական արդյունքով է պսակվել, նաև նշել է, թե սույն դատական վճռի շնորհիվ վերացվել է նաև դպրոցի ապագայի անորոշությունը:
Թարգմանեց Մելինե Անումյանը
Akunq.net
Leave a Reply