Դինքի սպանության պատվիրատուն պաշտոնաթող զինվորական է. գաղտնի վկա

Թուրքիայում սկանդալային «Էրգենեկոն»-ի գործով հերթական 253-րդ դատական նիստի ժամանակ գաղտնի վկան պնդել է, թե 2005-ին Թուրքիայի զինված ուժերի կապիտան Մուզաֆեր Թեքինը, ով այս պահին կալանված է «Էրգենեկոն»-ի գործի շրջանակներում, Թաներ Բուբերին առաջարկել է սպանել Հրանտ Դինքին։

Թուրքական Star-ի փոխանցմամբ՝  դատական հերթական նիստի ժամանակ գաղտնի վկան պնդել է, թե կապիտան Մուզաֆեր Թեքինը 2005-ին բանտից նոր դուրս եկած Թաներ Բուբերին առաջարկել է սպանել Հրանտ Դինքին՝ նրան տալով մաքուր չեք եւ նշելով, թե սպանությունից հետո նա կարող է ուզած թիվն ավելացնել եւ բանկից ստանալ այդ գումարը։ Վկայի խոսքով՝ Բուբերը հրաժարվել է կատարել այդ պահանջը։

Վկան պատմել է նաեւ, որ Թաներ Բուբերը 2005-ին իրենց հրահանգել էր Գազիօսմանփաշա թաղամասում թուրքերի եւ քրդերի միջեւ բախումներ հրահրել, եւ իրենք սկսել են հարձակվել կոնկրետ թիրախների դեմ, որի հետեւանքով դատվել եւ բանտ են նստել։

http://news.am/arm/news/127123.html