Իսրայելը հնարավոր է` ճանաչի՞ Հայոց ցեղասպանությունը

ԳԱԼԱ-ի լրագրողի հետ զրույցում թուրքագետ Լևոն Հովսեփյանը մեկնաբանեց Իսրայելի արած հայտարարություն-սպառնալիքը՝ ուղղված Թուրքիային: Հայտարարությունում մասնավորապես ասվում էր, որ եթե Թուրքիան չփոխի իր դիրքորոշումը Պաղեստինի հարցում, ապա Իսրայելն ավելի հաճախ կսկսի բարձրաձայնել Հայոց ցեղասպանության մասին, և այդ ժամանակ ի հայտ կգան այնպիսի փաստեր, որոնց մասին ոչ ոք չգիտի: Թորքագետն անդրադարձավ այս հայտարարությանը՝ ասելով, որ խնդիրը նրանում է, որ վերջին տարիներին այս լարված հարաբերություններում միշտ ինչ-որ քայլեր, լծակներ ունի Իսրայելը, որոնք օգտագործում է Թուրքիայի դեմ: «Ուղղակի սա հերթական հաղթաթուղթն է, հերթական լծակը Թուրքիայի դեմ ճնշում գործադրելու համար: Ի թիվս այլ լծակների, որ Իսրայելն ունի և կարողանում է որոշակիորեն ճնշում գործադրել Թուրքիայի վրա, Հայոց ցեղասպանությունը ևս հաղթաթուղթ է Թուրքիայի դեմ: Իսրայելը դժվար Հայոց ցեղասպանությունը ճանաչի մոտ ապագայում, այդ հայտարարություններն ուղղակի հերթական անգամ ճնշում գործադրելու համար են, քանի որ վերջին շրջանում Թուրքիայի՝ տարածաշրջանում ակտիվացումը, ներկայիս իշխանությունների վարքագիծը անհանգստացնում է նաև Իսրայելին» :

Ըստ Հովսեփյանի՝ սա ուղղակի հերթական ճնշում գործադրելու մեխանիզմներից մեկն է հանդիսանում, որը մեզ համար սխալ է և անընդունելի: Galatv.am-ի հարցադրմանը՝ հնարավո՞ր է, որ Թուրքիայի վրա ճնշումներ գործադրելու ժամանակ Իսրայելն, այնուամենայնիվ, ճանաչի Հայոց ցեղասպանությունը, թուրքագետը պատասխանեց. «Միգուցե ինչ-որ քայլեր կիրականացնի. Քնեսեթի օրակարգում կներառվի, բավական կբարձրաձայնվի, իսրայելական տեղեկատվական քաղաքական համատեքստում լուրջ ակտիվություն կնկատվի, բայց կրկնում եմ, որ այս ամենը հերթական լծակ է, որն օգտագործվում է Թուրքիայի դեմ ճնշում գործադրելու համար»:

Այդ դեպքում ինչպիսի՞ դիրքորոշում պետք է որդեգրի Թուրքիան հարցին, Լևոն Հովսեփյանը պատասխանեց. «Թուրքիայի ներկայիս իշխանությունները բավականին վճռական են իրենց քայլերում, սակայն ստիպված են հաշվի նստել Իսրայելի հետ, սակայն Թուրքիայի քաղաքականության մեջ, իմ կարծիքով, լուրջ փոփոխություններ չեն սպասվում»:

Լևոն Հովսեփյանը հավաստեց, որ թուրք-իսրայելական հարաբերություններում առաջիկայում բարելավվման գործընթաց չի սկսվի, բայց ըստ նրա՝ Թուրքիայի և Իսրայելի միջև ընթանում են գաղտնի բանակցություններ տարբեր ֆորմատներով, և այդ համատեքստում երկուստեք հավասարակշռված որոշակի մոտեցումներ կան: Վերջում Լևոն Հովսեփյանը նշեց. «Հայոց ցեղասպանության ճանաչումը քաղաքական գործարքների խնդիր չէ: Դա համամարդկային խնդիր է: Այն պետությունը, որը գնահատում է համամարդկային արժեքները և գտնում է, որ պետք է ճանաչի Ցեղասպանությունը և դատապարտվի, ապա դա տվյալ երկրի վարկանիշի, միջազգային համամարդկային արժեքներին հետամուտ լինելու իմիջն է: Եվ կարծում եմ, որ Հայաստանի Հանրապետությունը որևէ կերպ չպետք է ներգրավվի կամ չպետք է ինչ-որ կերպ այս գործընթացում շահարկվի»:

Մելինե Մաթևոսյան

http://www.galatv.am/news/view/israyel.html