Թուրքիայի Ազգային մեծ ժողովի նախագահ Ջեմիլ Չիչեքն ընդունել է Թուրքիայի և Ֆրանսիայի առևտրի պալատների ղեկավարներին և քննադատել Ֆրանսիային՝ Թուրքիայի հետ հարաբերությունները փչացնելու համար։
Ինչպես տեղեկացնում է «Անադոլու» գործակալությունը, Չիչեքը հայտարարել, թե երկու երկրների մեջ «սև կատու է անցել», որի պատճառը Հայոց ցեղասպանության հարցն է։
«Ինչո՞ւ սև կատու անցավ, հարաբերությունները փչացան՝ անհամ ու թթու դառնալով։ Ինչո՞ւ նման բան անելու անհրաժեշտություն զգացիք, մեզնից ի՞նչ վնաս էիք տեսել»,- հարցրել է նա։
Անդրադառնալով Հայոց ցեղասպանության մասին Ֆրանսիայում ընդունված, ապա հակասահմանադրական ճանաչված օրենքին, Ֆրանսիայի դասագրքերում Ցեղասպանությունը ներառելու փաստին` Չիչեքը հայտարարել է, թե դա թուրքերի և հայերի միջև պատմական հարց է, և Ֆրանսիան չպետք է կապ ունենա դրա հետ։
«Դա մեր և ձեր միջև եղած հարց չէ. հայերի և թուրքերի միջև հարց է՝ պատմական հարց։ Մենք պատրաստ ենք առերեսվել մեր պատմությանը»,–ասել է նա։
«Կան օբյեկտիվ պատմաբաններ, գիտնականներ, թող ձեր պատմաբաններն էլ ուսումնասիրեն խնդիրը։ Արդյունքում ինչ էլ որոշվի, մենք պատրաստ ենք ընդունել»,-նշել է նա՝ պնդելով, թե Ֆրանսիայի կողմից Հայոց ցեղասպանության ժխտումը քրեականացնող օրինագիծը ոտնահարում է մարդու իրավունքները։
Leave a Reply