Սասունի հայերի միության ղեկավար Ազիզ Դաղջըն դիմել էր Թուրքիայի Ազգային մեծ ժողովին (ԹԱՄԺ)՝ տեղեկացնելով Բաթման նահանգում ավերված եկեղեցու մասին։ Ի պատասխան` ԹԱՄԺ-ը գրություն է ուղարկել Բաթմանի նահանգապետարան՝ պահանջելով հետաքննություն սկսել։
Ինչպես տեղեկացնում է haberfx.net կայքը, դիմելով խորհրդարանի համապատասխան հանձնաժողովին՝ Ազիզ Դաղջըն տեղեկացրել էր, որ Բաթմանի Յենիփընար գյուղում հայերին պատկանող եկեղեցին օգտագործվում է որպես աղբանոց, եկեղեցու պատմական դուռը տեղից հանվել է, տեղահան են արվել նաև քարերը, և պահանջել էր հետաքննություն սկսել։
ԹԱՄԺ-ը կապվել է Բաթմանի նահանգապետարանի հետ՝ պահանջելով ճշտել՝ արդյոք տեղեկությունները համապատասխանում են իրականությանը։
«Մեր եկեղեցիները վերածվել են աղբանոցների։ Գերեզմանների մի հատվածն օգտագործվում է որպես ջուր պահեստավորելու վայր։ Այդ պատճառով մենք, որպես միություն, խորհրդարանին կոչ ենք անում հետաքննություն սկսել»,-ասել է Դաղջըն։
Հիշեցնենք, որ օգոստոսին Բաթմանի նահանգում ավերվել էր Սուրբ Մարութա Աստվածածին հայկական եկեղեցին։
«Մենք պահանջում ենք, որպեսզի եկեղեցին քանդողները վայրկյան առաջ բացահայտվեն: Հուլիսի 29-ից օգոստոսի 21-ն ընկած ժամանակահատվածի անվտանգության տեսախցիկների ձայնագրությունները պետք է ուսումնասիրվեն»,- ասել էր Դաղջըն:
Leave a Reply