Դինքի ընտանիքը բողոքարկել է Հրանտ Դինքի սպանության գործով դատավճիռը

Դինքի ընտանիքի փաստաբանները բողոքարկել են Հրանտ Դինքի սպանության գործով դատավճիռը: Բողոքարկման դիմումում նշվում է, որ բոլոր կասկածյալների հանդեպ դատավճիռները հակասում են օրենսդրությանը, և նրանք պետք է դատապարտվեն որպես «ահաբեկչական խմբավորման» անդամներ:
 Ինչպես տեղեկացնում է CNNturk-ը, Ստամբուլի 14-րդ դատարան ներկայացված 49-էջանոց բողոքարկման դիմումը ստորագրել են Դինքի երեք փաստաբանները, այդ թվում՝ Ֆեթհիյե Չեթինը: Նրանք ներկայացրել են 5 տարի տևած դատավարության ընթացքի վերաբերյալ իրենց դիտարկումները և պնդել, որ սպանության հետևում խմբավորում է կանգնած, ինչը բացահայտել է պետք:
 Նրանք պահանջել են, որ կասկածյալները դատապարտվեն որպես «խմբավորման» անդամեր և հիշեցրել են, որ դատախազ Հիքմեթ Ուսթան նույնպես բողոքարկման դիմում էր ներկայացրել՝ դարձյալ նշելով, որ «սպանության հետևում խմբավորում կա»:

 Դինքի ընտանիքի փաստաբանները պահանջել են փոխել 19 ամբաստանյալների դեմ կայացված դատավճիռները և Յասին Հայալին դատապարտել «ահաբեկչական խմբավորման ղեկավար լինելու», Էրհան Թունջելին` «ահաբեկչական խմբավորման ղեկավար լինելու և մարդասպանության դրդելու», Օսման Հայալին, Չոշքուն Չղջիին, Զեյնել Աբիդին Յավուզին, Մուսթաֆա Օզթուրքին, Թունջայ Ուզունդալին «ահաբեկչական խմբավորման անդամ լինելու, կանխամտածված սպանություն կատարելու համար օգնություն ցուցաբերելու» համար: Ամբաստանյալներ Էրսին Յոլջուին և Ահմեթ Իսկենդերին դատապարտել «ահաբեկչական խմբավորման անդամ լինելու», ևս 9 մարդու` «ահաբեկչական խմբավորմանն օժանդակելու» մեղադրանքներով:
 

http://tert.am/am/news/2012/05/30/dink/