Թուրք լրագրողները հայերի մոտ պատռեցին թուրք պրոֆեսորի դիմակը եւ տապալեցին նրա ելույթը

Թուրքիայի Կայսերի քաղաքում գտնվող Էրջիյեսի համալսարանի ռազմավարական հետազոտությունների կենտրոնում հայ եւ թուրք լրագրողների խմբի հանդիպումը կենտրոնի նախագահ Մեթին Հուլագուի հետ անսպասելի ընթացք ունեցավ:

Ինչպես Կայսերիից տեղեկացնում է NEWS.am-ի թղթակիցը, USAID-ի կողմից հովանավորվող եւ Եվրասիա համագործակցություն հիմնադրամի կազմակերպած ծրագրի շրջանակում հայ եւ թուրք լրագրողներից կազմված խումբը հանդիպել է Կայսերիի Էրջիյեշ համալսարանի պրոռեկտոր, ռազմավարական հետազոտությունների կենտրոնի նախագահ, Թուրքական պատմագիտական ընկերության անդամ Մեթին Հուլագուի հետ:

Ելույթի սկզբում Մեթին Հուլագուն նշեց, որ 40 հազար ուսանող ունեցող  Էրջիյեսի համալսարանին կից ռազմավարական կենտրոնը (ERUSAM) ստեղծվել է մեկ տարի առաջ: Նրա խոսքով՝ կենտրոնում ուսումնասիրություններ են իրականացվում տարբեր թեմաների վերաբերյալ, այդ թվում՝ Հայաստանի հետ հարաբերությունների եւ Հայկական սփյուռքի: «Մենք դրական տրամադրություններով են ոգեշնչված: Մենք ցանկանում ենք համագործակցել բոլորի հետ»,-նշեց նա՝ հիշեցնելով, որ իրենց համալսարանում հայերենի բաժին է բացվել, սակայն դասախոսների հարցում խնդիրներ ունեն:

«Մենք Հայաստանից 2 հոգու հետ պայմանավորվել էինք, ստացել համապատասխան թույլտվությունը, սակայն նրանք վերջին պահին հրաժարվեցին: Մենք որոշեցինք այլ տեղից հայերենի մասնագետ կանչել»-ասաց պրոֆեսորը՝ հավելելով, որ առաջին տարին հայերենի բաժին է ընդունվել 6, իսկ նախորդ տարի՝ 12 ուսանող:

Պրոֆ. Հուլագուն շարունակում էր խոսել հարաբերությունների կարգավորման, խաղաղության եւ հանդուժողականության մասին, երբ հայկական խմբի անդամներից Արմեն Սարգսյանը հարցրեց նրան, թե բոլոր ժամանակներում պատմական իրադարձություններին, տարբեր երեւույթներին կամ մարդկանց որոշակի խմբերին ինչ-որ տերմիններով են կոչել, որոնք հետագայում փոխվել են: «Օրինակ` նախկինում ասում էինք նեգր, իսկ հիմա՝ աֆրոամերիկացի: Այս համատեքստում «ցեղասպանություն» տերմինը ձեզ համար փոխոխվե՞լ է, եւ դա ինչ տերմինով եք բնութագրում»,-հարցրեց Արմեն Սարգսյանը:

Ահա այստեղ էր, որ վերջացավ պրոֆեսորի թվացյալ հանդուժողականությունը, նա խառնվեց իրար, փորձեց հասկանալ, թե ինչ է կատարվում եւ հապճեպ սկսեց հերքել. «Ի՞նչ կոտորած, նման բան չի եղել»,-ասաց Հուլագուն, ում հակադարձեցին խմբի թուրք լրագրողները՝ հարցնելով, որ եթե կոտորած չի եղել, ո ՞ւր են Կայսերիի հայերը, չէ՞ որ ողբերգություն է տեղի ունեցել: «Նրանք գնացել են, հեռացել են Կայսերիից, մենք հերքում ենք, որ կոտորած է եղել»,-պնդեց Մեթին Հուլագուն: Թուրք լրագրողներից մեկը շարունակեց. «Ինչպե՞ս թե գնացել են: Այդքան հայերը ինքնասպա՞ն են եղել»,- հեգնեցին պատմաբանին թուրք լրագրողները: Անսպասելի արձագանքից ուշքի չեկող թուրք պրոֆեսորը թուրք լրագրողին հայի տեղ դրեց, սակայն լրագրողն արձագանքեց. «Ես թուրք եմ, անունս՝ Քեմալ, ազգանունս՝ Բոզքուրթ: Ծնողներս նույնպես թուրք են եւ մուսուլման»:

Թուրք պատմաբանը պնդեց, թե հայերն այն ժամանակ «ավազակախմբեր» էին ստեղծել եւ կռվում էին թուրքերի դեմ, հետո «ահաբեկչություն» էին իրականացնում թուրք դիվանագետների դեմ: Թուրք լրագրողները հակադարձեցին՝ ասելով, թե նրա ասածները չեն արդարացնում տեղի ունեցած կոտորածները՝ հիշեցնելով Հրանտ Դինքի եւ նախորդ տարի ապրիլի 24-ին զինվորական ծառայության ժամանակ թուրք զինծառայակցի կողմից սպանված Սեւակ Շահին Բալքըչըի սպանությունը: Մեթին Հուլագուի նյարդերը տեղի տվեցին, եւ նա դուրս եկավ դահլիճից՝ առաջարկելով իջնել բակ՝ թեյելու:

Այդ ընթացքում, երբ պրոֆեսորն ու թուրք լրագրողները վիճաբանում էին, պրոֆեսորի ուսանողներից մեկը, ով հավանաբար հայերեն բաժնի ուսանողներից էր, մոտեցել է թուրք կին լրագրողներից մեկին՝ կարծելով թե նա հայ է եւ ասել. «Այստեղ 4 հայ է մնացել, որովհետեւ ձեզ կոտորել ենք»: Այս խոսքերը լսած մեկ այլ ուսանող միջամտել է՝ ասելով, թե իր ընկերը սխալ բան ասաց եւ ներողություն է խնդրել:

Հայ եւ թուրք լրագրողների խումբն անսպասելի զարգացումից ուշքի չեկած թուրք պրոֆեսոր Հուլագուի եւ նրա ուսանողների սառը հայացքների ներքո հեռացավ Կայսերիի համալսարանի ռազմավարական հետազոտությունների կենտրոնի շենքից, որը գտնվում է Կայսերիի նախկին հայկական թաղամասում՝ Թալասում: Այն շենքն էլ, որտեղ գտնվում է կենտրոնը, մի մեծ առանձնատուն է, որը ժամանակին, հնարավոր է, պատկանել է որեւէ հայի:

Մեթին Հուլագուն ավելի վաղ արած հայտարարություններից մեկում նշել էր, թե հայերեն բաժին բացելու նպատակը հայկական արխիվներում աշխատելու ունակ մասնագետներ պատրաստելն ու հայկական թեզերի դեմ պայքարելն է։

http://news.am/arm/news/107397.html