Հայերից հետո Անատոլիան կորցրել է իր հոգին, այն վերածվել է տափաստանային գաղութի, որը զուրկ է պատմությունից: Հայոց ցեղասպանության պատմական ճշմարտության մասին թուրք հասարակությանն իրազեկելու համար մայիսի 29-ին արժանանալով ՀՀ Նախագահի 2011 թվականի մրցանակի` այս մասին հայտարարեց թուրք գրող, հրապարակախոս Ռագըփ Զարաքոլուն:
Նրա խոսքով` տարածքներ, որոնք ժամանակին լի էին կյանքով, այժմ վերածվել են հնագիտական պեղումների վայրերի, իսկ ամենացավալին այն է, որ Անատոլիայի գաղութացումը եւ մարդաթափության գործընթացն այսօր էլ շարունակվում է: Թուրք հրապարակախոսի գնահատմամբ` հայերի հազարավոր տարիների գոյությունն Անատոլիայում ժխտելը, հայկական անուններն աշխարհագրությունից ջնջելը Հայոց ցեղասպանության շարունակության արտառոց օրինակ է:
«Անատոլիան կարոտում է իր անհետացած հայ զավակներին»,- «Արմենպրես»-ի հաղորդմամբ ասաց Զարաքոլուն` ցավով նշելով, որ վերջին տասնամյակում ժխտողական արդյունաբերություն է կառուցվել Թուրքիայում:
Leave a Reply