«Էրգենեքոն»-ը բացահայտում է Թուրքիայի կեղտոտ դեմքը. թուրք վերլուծաբան

Թուրք հայտնի քաղաքական վերլուծաբան Մեհմեդ Ալի Բիրանդը Թուրքիայում աղմուկ հանած իրադարձություններին եւ դատական գործերին իր անդրադարձում գրում է, որ թուրք ժողովուրդը մինչեւ 2008 թ. ապրել է «սատանաների կայսրությունում»: CNNTurk-ի քաղաքական վերլուծությունների բաժնի ղեկավարը նշում է, որ հերթական ռազմական հեղաշրջում նախապատրաստելու մեղադրանքով բացված «Էրգենեքոն» դատական գործը ի հայտ բերեց Թուրքիայի կեղտոտ դեմքը:

«Աբդի Իփեքչիի սպանությամբ սկսված Ուղուր Մումջուի եւ մյուս լրագրողների սպանությունները, Տրապիզոնի կաթոլիկ քահանա Սանտորոյի սպանությունը, Թուրքիայի պետական խորհրդի վրա արյունալի հարձակումը, Ստամբուլի «Ակօս» հայալեզու թերթի խմբագրապետ Հրանտ Դինքի եւ միսիոներների սպանություններն ու Սաբանջիի նկատմամբ մահափորձը, Գազի թաղամասում կոտորածն ու Մադըմաքի խայտառակությունը… Սրանց բոլորի մի մասի իրագործողներն այդպես էլ չհայտնաբերվեցին: Այն դեպքում, երբ պետությունը ցանկանում է, հանցագործները հայտնաբերվում են, իսկ այդ իրադարձությունների նկատմամբ պետությունը լռություն պահպանեց: Գնդակը նետվեց արտաքին ուժերի վրա: Մի ժամանակ` Իրանի կամ Քրդստանի աշխատավորական կուսակցության (PKK) կամ էլ` «Մոսսադ»-ի վրա: Բայց ներկայիս իշխանությունների դեպքում մտածելակերպը, կարծես թե փոխվում է: Մեղադրական ակտերի մանրամասները ցույց են տալիս, որ դրանք ոչ թե «արտաքին ուժերի», այլ հակառակը` «ներքին ուժերի» գործն է:

Թուրքիան իրականում վախի կայսրություն է եղել, որտեղ իշխել են հանցագործ ցանցերը: Ինչ անուն էլ որ տան նրանց, Թուրքիայի անցյալը սարսափ է ներշնչում, որովհետեւ մեզ մշտապես խաբել են արտաքին ուժերի կողմից սադրանքներ կազմակերպվելու ստերով եւ երկիրը մտցրել հանցագործությունների եւ մահափորձերի մեջ: Երբ՞ է գալու սրա վերջը: Թե՞ վաղը սատանաները կրկին դուրս կգան իրենց ծակերից», -երկյուղում է թուրք վերլուծաբանը:

http://armenpress.am/arm/news/692194/ergenekon-y-bacahaytum-e-turqiayi-kextot-demqy-turq.html