Կարո Փայլան. «Ժողովուրդների ժողովրդավարական կոնգրեսը (ԺԺԿ) պետք է կիսի հայերի ցավը»

Ինչպես հայտնում է marksist.org էլ. կայքը, Առաջին գլխավոր ասամբլեայում ելույթով հանդես եկած ԺԺԿ-ի գործադիր կոմիտեի անդամ Կարո Փայլանը ապրիլի 24-ին Հայոց ցեղասպանության տարելիցի ոգեկոչման միջոցառումների անբավարար լինելու պատճառով քննադատել է ԺԺԿ-ին:

Կարո Փայլանը հիշեցրել է, որ ապրիլի 24-ի ԺԺԿ-ն Հայոց ցեղասպանության տարելիցի մասին որևիցե հաղորդագրությամբ հանդես չի եկել և ցանկացել է, որ ապրիլի 24-ը հիշատակվի յուրաքանչյուր քաղաքում: Փայլանը հիշեցնելով, որ միայն մի քանի քաղաքում է ոգեկոչվել, ասել է. «100 տարի առաջ մենք ամենուր էինք: Այս պահին մնացել ենք 40 հազար հոգի, որի մեծամասնությունը բնակվում է Ստամբուլում: ԺԺԿ-ն միայն կենդանի մնացածների՞ կոնգրեսն է: Մեկ դար առաջ այս հողերի կեսը կազմում էին հայերը, ասորիները, եզդիները, հույները, իսկ հիմա մեկ հազարերորդականն ենք: Այս բացակայության մեջ բոլորս ենք մեղավոր»:

Փայլանը, առանց անունը նշելու, հիշեցնելով Ստամբուլի ոգեկոչման միջոցառման ժամանակ Ժողովուրդների փրկության կուսակցություն կոչված հրոսակների սադրիչ նախաձեռնությունը, հարցրել է. «Ստամբուլի ոգեկոչման միջոցառման ժամանակ մեզ մոտ կարմիր դրոշակներով եկողներ կային, սակայն եկել էին ոչ թե մեր ցավը կիսելու, այլ մեր ձայնը լռեցնելու: Մեկ շաբաթ անց տեսանք, որ այդ կազմակերպությունը մայիսի 1-ը համակարգող խմբում է: Կարիք չկա՞, որ մենք այդ կազմակերպություններից բացատրություն պահանջենք»:

Փայլանի ելույթը բազմիցս ընդհատվել է ծափահարություններով: Այնուհետև նա հույս է հայտնել, որ մյուս տարի ապրիլի 24-ին  ԺԺԿ-ն ամենուր կկիսի հայերի ցավը: