Թուրքիայում քուրդ պատգամավորին կդատեն գրոհայինի թաղմանը մասնակցելու համար

Թուրքիայի Դիարբեքիրի ծանր հանցագործությունների 5-րդ դատարանն այսօր քննել է քրդական «Խաղաղություն և ժողովրդավարություն» կուսակցության պատգամավոր Նուրսել Այդողանի դեմ հարուցված հայցը` ահաբեկչական համարվող Քրդական աշխատավորական կուսակցության (PKK) անդամի թաղման արարողությանը մասնակցելու մեղադրանքով:

Ինչպես տեղեկացնում է Haberturk-ը, Այդողանը 2011-ի խորհրդարանական ընտրությունից առաջ մասնակցել է Բիթլիսում ահաբեկչական խմբավորման և Թուրքիայի անվտանգության ուժերի միջև տեղի ունեցած բախումների ընթացքում սպանված PKK-ականի թաղման արարողությանը:

Արարողությունը վերածվել էր բողոքի ակցիայի, իսկ Այդողանը, ըստ մեղադրանքների, քայլել է քրդերի առաջնորդ Աբդուլլահ Օջալանի նկարը կրող թափորի հետևից:

Այդողանը նաև մեղադրվում է «ահաբեկչական խմբավորման անդամին» «նահատակ» անվանելու համար:

Կին պատգամավորի դեմ գործ է հարուցվել` «ահաբեկչական խմբավորման անդամ լինելու», «ահաբեկչական խմբավորման քարոզչությամբ զբաղվելու» մեղադրանքով: Եթե դա հաստատվի, նրան մինչև 15 տարվա ազատազրկում է սպառնում:

Դատական հաջորդ նիստը տեղի կունենա մայիսի 24-ին:

http://tert.am/am/news/2012/05/16/aydogan/