Բուխարեստի հայոց միությունում մայիսի 14-ին տեղի է ունեցել Հայոց ցեղասպանության 100-րդ տարելիցին նվիրված միջոցառումների տեղական հանձնաժողովի նիստը, որի ժամանակ պայմանավորվածություններ են ձեռք բերվել առաջիկա երեք տարվա ընթացքում համատեղ միջոցառումներ կազմակերպելու վերաբերյալ:
Նույն օրը Հայոց ցեղասպանության թանգարան-ինստիտուտի տնօրեն Հայկ Դեմոյանը ելույթ է ունեցել Բուխարեստի համալսարանում` ուսանողների, դասախոսական կազմի եւ արտահամալսարանական ունկնդիրների առջեւ:
Իր խոսքում Դեմոյանն ընդգծել է, որ Հայոց ցեղասպանությունը պատմական անցյալ չէ, այլ ավելի քան ներկա, քանի որ թուրքական իշխանությունները շարունակում են քաղաքական, տնտեսական եւ դիվանագիտական ճնշումներ գործադրել Հայաստանի վրա, ահաբեկում եւ հետապնդում են պատմական արդարության մասին արտահայտվողներին, միջազգային մակարդակով ծավալում ժխտողականության քաղաքականություն, վիրավորում եւ վարկաբեկում զոհերի հետնորդներին: Մոտ երկու ժամ տեւած դասախոսության ընթացքում Հայկ Դեմոյանը պատասխանել է նաեւ ունկնդիրների բազմաթիվ հարցերին:
Նախորդ օրը Հայկ Դեմոյանը դեսպան Համլետ Գասպարյանի հետ ներկա էր եղել Բուխարեստի Հայոց կենտրոնում մշակույթի տան նոր մասնաշենքի բացման արարողությանը, որի ընթացքում ներկայացվել էին Արարատ հրատարակչության լույս ընծայած` ակադեմիկոս Նիկոլայ Հովհաննիսյանի «Հայոց ցեղասպանություն» եւ Ռաֆայել դե Նոգալեսի/Rafael de Nogales «Չորս տարի կիսալուսնի տակ» գրքերի ռումիներեն թարգմանությունները:
Leave a Reply